О́nerkásip jáne qurylys mınıstrligi turǵyn úı jaǵdaılaryn jaqsartý úshin birjolǵy zeınetaqy tólemderin paıdalanýdyń qoldanystaǵy erejelerine ózgerister engizýdi usynyp otyr. Usynysqa sáıkes, «Otbasy bank» depozıtterinde birjolǵy zeınetaqy tólemderi qarajatyn jınaqtaý merzimi 3 jyldan 8 jylǵa deıin ulǵaıtylmaq.
Osy jyldyń 1 qańtaryndaǵy jaǵdaı boıynsha 135 myńǵa jýyq azamat óz qarajatyn birjolǵy zeınetaqy tólemderinen (budan ári – BJT) «Otbasy bank» AQ depozıtterine aýdardy jáne osy ýaqytqa deıin ıpotekalyq turǵyn úı qaryzdaryn resimdegen joq.
«Otbasy bank» AQ aqparaty boıynsha turǵyn úı zaemyn alý úshin qajetti bastapqy jarnany jınaqtaýdyń ortasha merzimi alty jyldy quraıdy. Osyǵan baılanysty, mınıstrlik azamattardyń turǵyn úı jaǵdaılaryn jaqsartý maqsatynda «Otbasy bank» AQ depozıtterinde BJT qarajatyn jınaqtaý merzimin 3 jyldan 8 jylǵa deıin ulǵaıtýdy usynady. Sonymen qatar erli-zaıyptylarǵa «Otbasy banki» AQ depozıtterin bir-birine BJT qarajatymen tolyqtyrýǵa múmkindik berý usynylady.
Sondaı-aq «Otbasy bank» AQ-men turǵyn úı qurylysy jınaǵy týraly shart buzylǵan kezde BJT-men tolyqtyrylǵan soma alýshynyń arnaıy shotyna qaıtarylady. Ol 20 jumys kúni ishinde osy qarajatty turǵyn úı jaǵdaıyn jaqsartýǵa paıdalana alady nemese birjolǵy zeınetaqy tólemderin paıdalaný qaǵıdalaryna sáıkes emdelý maqsatynda qoldanýǵa quqyly.
Turǵyn úı jaǵdaılaryn jaqsartý úshin birjolǵy zeınetaqy tólemderin paıdalanýdyń qoldanystaǵy erejelerine josparlanǵan túzetýler NQA ashyq derekter portalynda talqylanyp jatyr. Barlyq eskertý men usynys qabyldanǵannan keıin buıryq jobasy múddeli memlekettik organdarǵa kelisýge jiberiledi. Kelisý úderisi shamamen eki aıǵa sozylady.
Aıta keteıik, birjolǵy zeınetaqy tólemderine arnalǵan arnaıy shot – turǵyn úı jaǵdaılaryn jaqsartý jáne (nemese) emdelýge aqy tóleý maqsatynda BJZQ-dan birjolǵy zeınetaqy tólemderin esepteý úshin alýshy ashatyn aǵymdaǵy banktik shot.
BJZQ-daǵy qarajattyń artylǵan somasyn sheship alý múmkindigi 2021 jyldyń qańtarynan bastap berildi. Azamattar jetkilikti shekten asqan somany úsh maqsatqa jumsaı alady – turǵyn úı jaǵdaıyn jaqsartý, emdeý aqysyn tóleý jáne ınvestısııalyq kompanııalardyń basqarýyna berý. Biraq sol jyldyń jeltoqsanynda jetkiliktilik shegi joǵarylap ketip, kóp adam bul múmkindikti paıdalanýdan qaǵyldy. Odan keıin shekten asatyn somany «Otbasy banktegi» depozıtke aýdarýǵa ruqsat etildi.
2021 jyldan beri zeınetaqy qorynan alynǵan 3,3 trln teńge turǵyn úı satyp alýǵa jumsalǵan. Jalpy, 1,4 mln ótinim berilgen.