Aýyl medısınasynyń áleýetin arttyrý – áli de kúshindegi másele. Jaqynda taǵy Shet aýdanyndaǵy úsh eldi mekende feldsherlik-akýsherlik pýnkt ashylyp, qoldanysqa berildi.
Bul joly Aqshataý kenti men Kıikti, Bosaǵa aýlynan ashyldy. Aýyldaǵy aǵaıyn máre-sáre bolǵan osyndaı ıgilikti istiń aldaǵy ýaqytta da jalǵasyn tabatynyna senimin bildirip, ardagerler qaýymy alǵysyn jetkizdi.
«Densaýlyq saqtaý – qoǵamnyń áleýmettik ómiriniń mańyzdy salasy. Densaýlyq salasy – elimizdiń ulttyq saıasatynyń basty baǵyttarynyń biri. Búgingi tańda densaýlyq saqtaý salasyn jetildirý úshin qomaqty qarjy bólinip jatyr. Bul aýyldaǵy aǵaıynnyń densaýlyǵyna alańdaǵan Memleket basshysynyń elge degen izgi bastamasy dep bilemin. Deni saý ultqa aınalý jolynda eńbek etip jatqan barshańyzǵa alǵys bildiremin», dedi Shet aýdanynyń qurmetti azamaty Serik Qambar aqsaqal.
Sonymen qatar ájeler táttiden shashý shashyp, jınalǵan kópshilik jańa ǵımarattyń ishine kirip, bólmelerin aralap kórdi. Feldsherlik-akýsherlik pýnkttiń bólmeleri keń, jyly da jaıly. Munda dárigerlerdiń tıisti em-dom kórsetýine, turǵyndardyń kelip, sapaly em alýyna tolyq jaǵdaı jasalǵan.
Aıta keteıik, bıyl Shet aýdanynyń 14 eldi mekenine osyndaı medpýnktterdiń qurylysyn bastaý josparlanyp otyr. Bul aýyl halqynyń sapaly jáne ýaqtyly medısınalyq qyzmet alýyna úlken septigin tıgizbek.
Qaraǵandy oblysy,
Shet aýdany