Pavlodar mamańdary ormandarda jaıtartqysh ornatyp, órttiń aldyn alýdy maqsat etip otyr. О́tken jyly oblysta 207 orman órti tirkelip, tilsiz jaý 3 905 gektar jerdiń jasyl jamylǵysyn jaıpap ótken.
Ormanshylardyń málimetinshe, orman-toǵaıda paıda bolatyn órtke kóbine naızaǵaı sebepker eken. Dáıekteı aıtqanda, dala órtteriniń 75 paıyzy jaı otynnan tutanady. Byltyr dala órtteriniń 22 jaǵdaıynda tilsiz jaýdyń memlekettik orman qory aýmaǵyna ótip ketkeni tirkelipti. Taǵy eki órt oshaǵy elektr jelileriniń úzilýinen paıda bolǵan. Al jalpy órtten kelgen shyǵyn 2 mln teńgeden asypty.
О́ńirlik Tótenshe jaǵdaılar departamenti bastyǵynyń orynbasary Qaırat Shaımardenovtiń pikirinshe, aǵash qoryn kádimgi jaıtartqyshtardy ornatý arqyly saqtap qalýǵa bolady.
– Ormandy jerlerdiń naızaǵaı jıi túsetin ýchaskelerin zerttep shyǵýdy usynamyn. Odan soń jaıtartqyshtar ornatatyn aımaqtardy talqylap alýymyz qajet. Bıyl ormandaǵy órt qaýipsizdigi erejelerine biraz tolyqtyrý enip otyr. Soǵan oraı biz óz jumysymyzdy aldyn alý turǵysynan jetildirýimiz kerek, – deıdi Q.Shaımardenov.
Qyzyq bolǵanda, óńirdegi orman-toǵaıly jerlerde birde-bir jaıtartqysh joq bolyp shyqty. Orman sharýashylyǵy jáne janýarlar dúnıesi aýmaqtyq ınspeksııasynyń basshysy Rýslan Tólepbaevtyń sózinshe, bul másele «Ertis ormany» rezervaty boıynsha talaı márte kóterilipti. Ol jerdegi aǵash jamylǵylarynyń aýmaǵy óte úlken.
– Rezervatta naızaǵaı túsýden órt shyqqan oqıǵalar jıi kezdesip jatady. Biraq ormannyń árbir gektaryna jaı tartatyn qurylǵylar ornatý múmkin emes. Orman sharýashylyqtarynda ony satyp alýǵa jáne ornatýǵa qarajat joq, – deıdi ol.
Maman kún jylyna mekeme qyzmetkerleri rezervat aýmaǵyn sholyp, taldaý jasaıtynyn, sonyń nátıjesine oraı qaýipti aımaqtarda tym bolmaǵanda 10 jaıtartqysh ornatyp kóretinderin jetkizdi. Baıanaýyldyń taýly aımaqtarynda mundaı qurylǵylardy ornatý qıynǵa soǵatyny anyq. Jalpy, orman arasynda mundaı bir jaıtartqysh baǵandy ornatýdyń ózindik quny shamamen 250 myń teńge turady.
Aıtyp óteıik, «Ertis ormany» rezervaty aýmaǵyndaǵy relıkti qylqan japyraqty aǵashtar elimizdiń soltústik-shyǵys óńirinde ǵana kezdesedi. Ejelgi muhıttyń tabanynda, qum jaldarynda ósip shyqqan Ertis «orman jolaǵy» Shaldaı jáne Besqaraǵaı orman sharýashylyqtarynan, onyń ishinde 16 ormanshylyqtan turady. Jalpy aýmaǵy 162 myń orman jamylǵysy qorǵalýy jaǵynan asa qundy orman alqaptary sanatyna enedi. Búginde rezervat aýmaǵynda ósimdikterdiń 84 túri tirkelse, ǵylymı zertteý jumystarynyń nátıjesinde floranyń alýandyǵy keńeıip, 226 túri anyqtalypty. «Qyzyl kitapqa» engizilgen janýarlar men qustardyń 7 túri, túrli tuıaqty ań, sonyń ishinde shamamen 190 bulan ormandy meken etedi.
Buǵan qosa Pavlodar oblysynyń aýmaǵynda «Baıanaýyl memlekettik ulttyq tabıǵı parki», sondaı-aq jalpy aýmaǵy 127,5 myń gektar jerge ıe orman jáne janýarlar álemin qorǵaý jónindegi kommýnaldyq memlekettik mekemeler («Pavlodar», «Úrlitúp», «Maksım Gorkıı») bar ekenin aıtyp óteıik.
Pavlodar oblysy