Qazirde halqymyzdyń quqyqtyq saýaty arta túskenin bıliktiń ókilderiniń keri baılanysqa shyǵyp, únemi atqarylyp jatqan jumystarymen tanystyryp otyrýynan, jurtshylyqtyń der kezinde tyń aqparattar alyp, quqyqqa saı áreket ete bilýinen baıqaýǵa bolady. Bul Prezıdentimizdiń: «Biz ozyq oıly ult retinde tek alǵa qaraýymyz kerek» degen oıyn aıshyqtaı túskendeı.
Memleket basshysy Qasym-Jomart Toqaevtyń «Egemen Qazaqstan» gazetine bergen suhbatynda Qańtar qasiretine qatysty bildirgen kózqarasy úlken mańyzǵa ıe. Prezıdent suhbatynda qańtar oqıǵasynyń oryn alý sebepterin naqtylap berdi. Barlyq aıtylǵan oılarynan qańtar oqıǵasynyń astary óte tereńde jatqandyǵyn baǵamdaýǵa bolady.
Advokat retinde birqatar beıbit turǵyndardyń, keıbir kúdiktilerdiń zańdy múddesin qorǵaǵanymda, birshama jaıttardy is materıaldaryndaǵy tergeýshilerdiń kórkem ádebıetshideı sheber sıpattap, ony kóshirip, basqa isterdiń materıaldaryna qosa beretindigi meni tań qaldyrǵanyn jasyra almaımyn. Sebebi kúdikti dep taný týraly eki-úsh betten turatyn qaýly bolsa, sonyń jarty paraǵy ǵana tıisti kúdiktige qatysty áreketter, qalǵany jalpy kóshirme sıpattaý sózderi edi. Zań qujattary naqtylyqty talap etedi. Tipti keıbir iste birin-biri múldem tanymaıtyn, toptyń arasynda jáı júrgen adamdardy, qol telefony sıgnaldary ózara jaqyn jerlerden tartqan azamattardy bir top qurdy degen jeleýmen ustap, olarǵa qatysty tergeý amaldaryn júrgizip, sotqa jetkizgen ister de bar. Tipti ustap ákelgen adam olardy shynymen de tanymaıtynyn, jol-jónekeı qosylǵanyn aıtyp tursa da, «qamaımyz» dep qorqytyp, qysym jasaýǵa árekettengen kezder de boldy.
Osy rette biz naǵyz kúdiktiler men basym kópshilikke ere shyqqan qarapaıym halyq ókilderin ajyrata bilýimiz kerek. «Eki túıe súıkense, arasynda shybyn ólediniń» kebin kımes úshin qańtar oqıǵasyna qatysty dep kúdik keltirilgen biraz adamdardyń isterine osy turǵydan mán bergen abzal. Bul máselede Prezıdenttiń «Qańtar oqıǵasyna qatysqandarǵa raqymshylyq jasaý týraly» zańdy qabyldaýy arqyly sol ortada qyzýqandylyqpen, buzaqy topqa ilesip quqyq buzǵandarǵa qatysty jazany jeńildetýge jol ashty.
Aıta ketý qajet, qańtar oqıǵasy ispettes aýqymdy quqyq buzýshylyqpen kúres júrgizýdegi quqyq qorǵaý organdarynyń qyzmeti de bul tusta úlken synǵa tústi. «Bireý toıǵa aınalǵanda, keıbireýlerdiń qoıǵa bas salǵany» da joq emes. Onyń baǵasy ýaqyty kelgende berile jatar. Sol kezdegi kúrdeli ahýaldan da ótken memleketimiz ben halqymyzdyń bolashaǵy jarqyn bolaryna senemin. «Halyq únine qulaq asatyn memlekette» máseleler tek beıbit alańdarda, mádenıetti túrde sheshilýge tıis. Bul turǵydan alǵanda halyqtyń quqyqtyq saýattylyǵy deńgeıi de sol qańtar oqıǵasy kezinde qylań bergenin jasyra almaımyz. Degenmen qańtar oqıǵasynan keıin memleketimiz kóp jylǵa eseıdi.
Búginde halyqtyń qarjylyq saýattylyǵy máselesi de ózekti. Suhbatta sóz bolǵan «halyqtyń qaryzǵa batýyna» baılanysty memleket tarapynan jasalyp jatqan tyń sharalardyń nátıjesi osy jolǵy Úkimet basshysynan kútetin jaqsy bastamalardyń biri bolatynyn aıta ketken jón. Orta býynnan jas býyn sabaq alatyny zańdylyq desek, biz eńbekqor, bilimpaz, kásibı, adal, bastamashyl, meıirimdi, qarapaıym qasıetterimizben «elim dese emirenip turatyn» bolashaq urpaqqa úlgi kórsete bilýimiz kerek. «El bolam deseń, besigińdi túze» demekshi, árbir otbasy óz qundylyqtaryn arttyra otyryp, ádiletti Qazaqstannyń shańyraǵyna bir-bir myqty ýyq bolyp qadalýy kerek.
Roza О́MIRTAI,
Ál-Farabı atyndaǵy QazUÝ-dyń aǵa oqytýshysy