BUU boljamy boıynsha 2050 jylǵa qaraı ýrbanızasııa 70%-ǵa jetýi múmkin. Qazaqstandaǵy qala halqynyń úlesi de ósip keledi. Senator Janbolat Jórgenbaev óziniń depýtattyq saýalynda aýylda ómir súrýge arnalǵan keshendi jaǵdaı jasaý qajettigi týraly aıtty, dep jazady Egemen.kz Senattyń baspasóz qyzmetine silteme jasap.
Senator eńbek naryǵy men áleýmettik ınfraqurylymdy damytý turǵysynan óńirler de, megapolıster de búginde mundaı kóshi-qonǵa daıyn emes ekenin aıtty. Depýtat basty maqsat – aýyldyq aýmaqtardyń áleýmettik ınfraqurylymyn jetildirý negizinde elimizdiń qaýipsizdigin qamtamasyz etý qajettigin aıtty.
- «Aýyl – el besigi» baǵdarlamasy aıasynda 2019-2023 jyldary respýblıkalyq bıýdjetten 524 mlrd teńge bólinip, 1,5 myńnan asa aýyldyq eldi mekende 5 myńnan astam joba iske asyryldy. Áıtkenmen onyń nátıjesi kóńil kónshitpeı otyr. Shekara mańyndaǵy aýyldardaǵy bıýdjettik ınvestısııalyq jobalardy qarjylandyrýǵa baǵyttalǵan bólek bıýdjettik baǵdarlama ashý kerek. Sonymen qatar, qoldanystaǵy zańnamada belgilengen aýyldyq ústemaqydan tys memlekettik shekaraǵa 50 km jaqyn ornalasqan aýyl qyzmetkerleri úshin laýazymdyq jalaqyǵa 50%-ǵa deıingi mólsherde ústemaqy belgileý múmkindigin qarastyrý kerek, - dedi J.Jórgenbaev.