Qarǵyn sýǵa daıyndyq

«Ázirge, qarǵyn sýdy qarsy alýǵa ázirlik oıdaǵydaı júrip jatyr. «Qazgıdromettiń» má­li­metine qaraǵanda, byltyr kúz­degi topyraqtyń ylǵaldylyǵy qalyptaǵydan 67 paıyzǵa artyq bolypty. Bul qar sýynyń to­pyraqqa sińýin azaıtady, son­dyqtan táýekel aımaǵyndaǵy aýyldardy sý basyp qalý qaýpi bar. Biz turǵyndary 5 myń adamnan asatyn 1 729 aýlasy bar osyndaı 87 eldi mekendi qazir esepke alyp, olarǵa jedel kómek uıymdastyrýdy jos­parlap otyrmyz», dedi Erik Temirhanuly.

Keıingi jyldary tasqynǵa qar­sy amaldar bizde jaqsy júrgizilip keledi. Táýekeli zor aı­maq­tarda ornalasqan 175 eldi me­kenniń mańyna 131 shaqyrymǵa sozylatyn orlar turǵyzylǵan. Jeti shaqyrymdaı jerge artyq sý jınaqtalatyn dambalar qa­zylǵan. Oblystyń avtomobıl joldarynda sý ótkizetin 97 ótkel ta­zalanǵan. 60 shaqyrymdaı jerge drenajdyq júıeler tar­tylǵan. Kólder men ózenderdiń jaǵalaýlary kóterilgen, sonymen birge ózenderdegi bógetter tazalanǵan.

«Osy jumystardyń bári tasqynnyń aldyn alýǵa mursat berýge tıisti. Biz bul jumystardy áli de tyńǵylyqtaı túsemiz. Je­del qarsy turý jumystaryna TJD, Polısııa departamenti, Ult­tyq ulan qatarynan 472 adam men 134 tehnıka tartylyp otyr. Naqty aıtar bolsaq, TJD-dan – 250 adam men 50 birlik tehnıka, Ulttyq ulannan – 60 adam men 3 birlik tehnıka, Polısııa departamentinen 162 adam men 81 birlik tehnıka daıyndyq sapynda tur. Sonyń ishinde TJD quramynda halyqty kóshirý men evakýasııalaýǵa arnalǵan bógetsiz júre alatyn 10 vahtovka, 6 batpaq keshkish tehnıka bar. Sońǵynyń ekeýi Petropavlda, qalǵany Esil, Tımırıazev, Aqjar, Músirepov aýdandaryna bir-birden berilgen. Jeti júzgish quraldar, 78 motopompa, 370 sý ótkizbeıtin kos­tıýmder, 400 adam syıatyn 21 shatyrymyz da daıyn», dedi TJD bastyǵy.

Qutqarý kúshteri burnaǵy jyl­dardaǵy tájirıbeni eskerip, barynsha qaýipti aımaqtarǵa shoǵyrlandyrylǵan. 24 qańtardan bastap oblysta daıyndyqtyń je­tildirilgen rejimi engizildi. Tas­qynǵa qarsy kúresti oblys ákimi óz baqylaýyna alyp otyr. Tasqyn byltyr qyrkúıekte ǵana taǵaıyndalyp, mundaıdy áli kórmegen oblys ákimin de, Túrkistan oblysynan sol ýa­qytta kelgen TJD bastyǵyn da synaqtan ótkizbek. Jyl basy­nan beri oblys ákimi Ǵ.Nur­mu­­ham­betov tasqynǵa qarsy turý shtaby men tótenshe jaǵ­daı­­lardy joıý jónindegi ko­mıs­sııanyń birneshe jumys otyrysyn ótkizip, tıisti tapsyrmalar berdi. Onda tasqynnyń bary­sy men qarqynyn baqylaýǵa jáne qutqarý jumystaryna «Qaz­AvıaQutqarý» AQ tikushaq­taryn tartý máselesi de qaralyp, bul ju­mystarǵa 130 mln teńge bólindi. Pılotsyz ushatyn appa­rattardy daıyndyq sapyna qoıý tapsyryldy. Aýdandyq ákim­dikterdiń balansynda ondaı­dyń 9-y bar, al beseýi – TJD balansynda.

Aıyrtaý, Ǵ.Músirepov jáne Ýálıhanov aýdandarynda shaǵyn ózenderdiń aǵyn sýlaryn bógeıtin seńderdi jarý úshin 11 mln teńgege jarylǵysh zattar alý men mamandardy tartý qarastyrylǵan.

Jergilikti atqarý organdary da 1 484 adam kúshi, 1 127 birlik tehnıka, 71 birlik sý aıdaıtyn tehnıka jáne 297 motopompadan turatyn tasqynǵa qarsy kúshterdi ázirlep otyr. Búgingi tańda aýyl­dyq okrýgter úshin taǵy da 58 motopompa alý josparlanǵan. So­nymen birge aýyr ınjenerlik tehnıkalardy qosymsha jalǵa alý úshin konkýrstyq prosedýralar júrgizilip jatyr.

Qazirgi kezde Petropavl qa­lasy men aýdan ákimderi sýdy bógeıtin 9 myń tonna ınertti materıaldar, 38 myń tonna qaptar jáne 87 tonna JJM ázirlep otyr. Oblys boıynsha evakýasııalanǵan turǵyndardy qabyldaıtyn 242 qabyldaý beketteri daıyndalǵan. Ákimdikter olarǵa tamaq ónimderi jáne basqa da qajetti zattardy jetkizetin fırmalarmen keli­simsharttar jasasyp qoıdy. Den­­saýlyq saqtaý basqarmasy qa­jetti medıkamentterdi jetkizý joldaryn anyqtaǵan.

Tasqynnyń aldyn alý sharalary eldi mekenderdiń ishinde de júrgizilip jatyr. Jyl basy­nan beri 696 myń tekshe metr qar shyǵaryldy. Biraq bul iste syl­byrlyq bary baıqalady. Ási­rese Petropavl qalasyndaǵy jekemen­shik úılerdiń tusyndaǵy taý bolyp aýlalardan shyǵarylǵan qar áli kúnge tolyq tasylyp bolǵan joq. Kún kúrt jylynyp ketse, bu­lardan keletin zııan az emes.

Soltústik Qazaqstan oblysy