Qaraǵandy oblysynda eń qajetti azyq-túlik ónimderi baǵasynyń negizsiz ósýi tirkelmegen. Bólshek saýda nysandarynda zańmen ruqsat etilgen 15% ústeme ǵana saqtalyp otyr.
Qaraǵandy oblysynda áleýmettik mańyzy bar azyq-túlik taýarlarynyń baǵasyn turaqty ustap turý úshin nendeı sharalar qolǵa alynyp jatqany jaıynda О́ńirlik kommýnıkasııalar qyzmeti platformasynda ótken brıfıngte Kásipkerlik basqarmasynyń basshysy Irına Lıýbarskaıa jáne aýyl sharýashylyǵy basqarmasy basshysynyń orynbasary Syrym Boshpanov aıtyp bergen edi.
О́ńirde baǵany retteý maqsatynda birneshe tetik qoldanylady: óńirlik turaqtandyrý qory qurylady, óndirýshilerge aınalym shemasy boıynsha nesıeler beriledi, memorandýmdar jasalady.
– «Saryarqa» ÁKK baǵasyn turaqtandyrý úshin 2 219 tonna bakaleıa ónimi, onyń ishinde 404 tonna kúrish, 422 tonna qant, 73 tonna qaraqumyq jarmasy, 90 myń lıtr kúnbaǵys maıy, 1 230 tonna birinshi surypty un jetkizý týraly kelisimshart jasaldy. Sondaı-aq 690 tonna kartop, 274 tonna sábiz, 520 tonna pııaz jáne 222 tonna qyryqqabat úshin nesıe sharttary jasaldy, – dedi S.Boshpanov.
Aınalym shemasy sheńberinde áleýmettik nan 90 teńgeden, birinshi surypty un – 154 tg/kg jáne makaron – 245 tg/kg satylady. «Qurma» agrofırmasy» qus fabrıkasy dúkenderge on dana jumyrtqany 480 teńgeden jetkizedi.
Kásipkerlik basqarmasy kúndelikti negizde bizdiń oblysta óndirilmeıtin áleýmettik mańyzy bar ónimderdiń bolýy men baǵasyna monıtorıng júrgizedi. Bul – 19 ataýdyń beseýi – qant, tuz, qaraqumyq jarmasy, untaqtalǵan kúrish, ósimdik maıy.
Qalalar men aýdandardyń ákimdikteri saýda uıymdarymen áleýmettik mańyzy bar azyq-túlik ónimderine eń tómengi saýda ústemesi – 5-10% bolatyny týraly 2832 memorandýmǵa qol qoıdy.
– 400-den asa áleýmettik buryshtar men sóreler quryldy, onda bul ónimder eń tómengi baǵamen usynylǵan. 20-dan asa áleýmettik pavılondar jumysyn jalǵastyryp jatyr. Jyl basynan beri 50-den astam jańa saýda nysandary iske qosyldy, olarmen birden ÁMAT-qa eń tómengi ústemeaqy týraly memorandýmdar jasalady, – dedi I.Lıýbarskaıa.