L.N.Gýmılev atyndaǵy Eýrazııa ulttyq ýnıversıtetinde Dúnıejúzilik ekskýrsııa júrgizýshileri kúnine oraı Qazaqstan gıd mamandarynyń I respýblıkalyq forýmy ótti. Is-sharaǵa Týrızm jáne sport mınıstrligi, «Kazakh Tourism» UK AQ, «Atameken» UKP ókilderi qatysty. Sonymen qatar ǵalymdar, gıd-aýdarmashylar, osy salanyń ardagerleri men ishki jáne syrtqy týrızm jónindegi menedjerler boldy.
Ekskýrsııa – tanymdyq maqsatqa qurylǵan ujymdyq sapar. Halyq arasynda mádenı aǵartý jumysynyń mańyzdy bóligi bolyp esepteletin bul sala elimizde birshama jolǵa qoıylǵanymen, jetildiretin tustary jeterlik. Osy oraıda mamandar Qazaqstandaǵy týrızmdi damytý, ekskýrsovodtardyń biliktiligin arttyrý jáne jumys sapasyn jaqsartý alǵysharttary tóńireginde oı-pikirlerin ortaǵa salyp, ashyq dıolog alańyn ótkizdi.
Eýrazııa ulttyq ýnıversıtetiniń strategııalyq damý jónindegi prorektory Dýman Aıtmaǵambetov forýmǵa qatysýshylardy kásibı merekesimen quttyqtap, jıynnyń keler jyly da jalǵasyn tabýyna tilektestigin jetkizdi.
«Ekskýrsııa – san túrli salany qamtıtyn, sınkretti jumys. Sondyqtan kelesi jyly ótetin forýmǵa ýnıversıtetimizdiń tarıhshylary men ádebıetshilerin de jumyldyrsaq, nur ústine nur. Bul máseleni jan-jaqty zerttep, jaqsy nátıjege qol jetkizýimizge sebep bolady», dedi ol.
«Kazakh Tourism» UK» AQ basqarma tóraǵasynyń orynbasary Danıel Serjanuly otandyq týrızmdi ortalyqtandyrý maqsatynda gıdter men ekskýrsovodtardyń qyzmetin sıfrlandyrý kerek ekenin aıtyp, qanatqaqty jobany tanystyrdy. Joba maqsaty – eldegi barlyq ekskýrsovod pen gıdterdi arnaıy bazaǵa bekitilgen beıdjben qamtasyz etý. Ondaǵy QR kod arqyly týrıster ekskýrsovod nemese gıdtiń biliktiligin jáne aqparat mátinin oqı alady.
«Aqparattyń kóptiginen ekskýrsovodtartyń ǵylymmen rastalmaǵan derekterdi keltirip júrgeni baıqaldy. Osy máseleni qolǵa alý maqsatynda barlyq ekskýrsııa qyzmetkerlerine beıdjder arqyly naqty tekserilgen ortaq mátin usynylady. Bul halyq arasynda jalǵan aqparattyń taraýyna jol bermeıdi», deıdi ol.
Pedagogıka ǵylymdarynyń doktory, týrızm salasynyń ardageri Evgenıı Nıkıtınskıı ekskýrsııadaǵy pedagogıkalyq jáne psıhologııalyq úderiske toqtalyp, qyzmetkerlerdiń halyqpen qarym-qatynasyn jaqsarýǵa kúsh jumsaý kerektigin atap aıtty.
Forým uıymdastyrýshysy, «Arman tour» týrıstik agenttiginiń dırektory Saltanat Ábjanova bolsa, Qazaqstandaǵy ekskýrsııalyq istiń qalyptasý tarıhyn baıandaı kele sheshilýge tıis birqatar máseleni kóterdi.
«Máselen, kadrlardy akkredıtteýdiń biryńǵaı júıesin qurý, saraptamalyq-ádistemelik keńestiń erejesin daıyndaý, qyzmetkerlerdiń quqyqtyq mártebesin naqtylaý, barlyq ekskýrsovod pen gıdterdiń biryńǵaı kıim úlgisin jasap shyǵarý sekildi maqsatymyz bar. Sonymen qatar kásibı merekemizge oraı respýblıkanyń ár aımaǵynda halyqaralyq dárejedegi forým, festıvaldar uıymdastyryp otyrýymyz kerek. Sol is-sharada «eń úzdik gıd-ekskýrsovod» sekildi júldeli baıqaýlardy ótkizsek, el nazaryn kóbirek aýdara alamyz dep senemin», dedi S.Ábjanova.
«Taý gıdteriniń ulttyq qaýymdastyǵy» qoǵamdyq birlestiginiń basshysy Olesıa Lavrenova Týrızm jáne sport mınıstrligi men Densaýlyq saqtaý mınıstrligi arasynda tyǵyz baılanys ornatýdyń mańyzyn basa aıtty.
«Qazaqstandaǵy taý týrızmi – tıisti nazar aýdarylmaı kele jatqan sala. Qatar ornalystyrsa, Germanııanyń 50 paıyzyn, Fransııanyń 30 paıyzyn jaılaıtyn taýlarymyz bar. Alaıda biz osyndaı múmkindikti paıdalana almaı otyrǵanymyz ókinishti. Qazaqstandaǵy taý týrızminiń damýyna kedergi bolyp otyrǵan birneshe túıtkildi túıinder bar. Mysaly, týrısterdiń oqys taý aýrýynan saqtandyrý joq. Qutqarý qyzmeti týrısterdiń taýǵa shyǵýyn baqylamaıdy, tek onyń saldarymen ǵana jumys isteıdi. Týrısterdi marshrýtqa tirkelýi eshqandaı qujatsyz júzege asyrylyp ketedi», dedi ol.
Is-sharanyń qorytyndy bóliminde eńbegi sińgen ekskýrsııa qyzmetkerlerine Alǵyshat tabystaldy.