Elimizdiń kóshi-qon zańdylyǵyn buzatyn sheteldikter ábden shekten shyqty. Atyraýlyq polısııa qyzmetkerleri ótkizgen «Mıgrant» jedel aldyn alý is-sharasy kezinde zańsyz júrgen ózge memleketterdiń azamattary ustaldy. Elimizdiń zańyn eren sanamaǵan sheteldikterdiń arasynda Aýǵanstan men Bangladesh Respýblıkasynyń alty azamaty bar.
Atyraý oblystyq polısııa departamenti baspasóz qyzmetiniń málimetinshe, alystaǵy shetelderdiń azamattary 2023 jyldyń qazan – jeltoqsan aılary aralyǵynda Qazaqstan aýmaǵyna saýda-sattyq, marketıng júrgizý maqsatymen kelip, Almaty jáne Qostanaı qalalaryna barǵany anyqtalǵan. Alaıda olar vıza merzimi ótkenimen, el aýmaǵynan shyqpaı qalǵan. Osyǵan baılanysty sot sheshimimen tórt sheteldikke aıyppul salyndy. Eki azamattyń vızasy jaramsyz dep tanyldy. Kóshi-qon zańnamasynyń talaptaryn buzǵan olardyń bárine Qazaqstan Respýblıkasynyń aýmaǵynan ketýge shyǵý vızasy berildi. Endi olar elimizdiń shekarasynan 15 kúnniń ishinde shyǵyp ketýi kerek.
Munaıly óńirde 19 aqpannan beri «Mıgrant» jedel profılaktıkalyq is-sharasy ótip jatyr. Onyń maqsaty – kóshi-qon zańdylyǵyn buzǵan shetel azamattaryn anyqtaý, el aýmaǵynan óz erkimen ketý týraly sot qaýlysyn oryndamaǵan sheteldikterdi májbúrli túrde shyǵarý. Úsh kúnde Atyraý qalasynyń aýmaǵynda zańsyz jumys istep júrgen 50-den asa sheteldik anyqtaldy. О́zge eldiń azamattaryna qatysty Ákimshilik quqyq buzýshylyq týraly kodeksi 517-babynyń 5-tarmaǵymen (Sheteldiktiń nemese azamattyǵy joq adamnyń júzege asyratyn qyzmeti vızada kórsetilgen maqsattarǵa sáıkes bolmaýymen kóringen, Qazaqstan Respýblıkasynyń halyqtyń kóshi-qony salasyndaǵy zańnamasyn buzýy nemese jergilikti atqarýshy organ óz betinshe jumysqa ornalasýǵa ruqsatty alý eńbek qyzmetin júzege asyrýy) ákimshilik hattamalar toltyryldy. Jınaqtalǵan is qujattary sotqa joldandy.
Sheteldikter zańyz júrgenimen qoımaı, alkogoldik ishimdik iship, mas kúıinde kólik júrgizetindi shyǵardy. Polısııa qyzmetkerleri 20 aqpanda Atyraý qalasyndaǵy I.Taımanov dańǵyly boıynda «Chevrolet Cobalt» markili avtokóligin toqtatty. Tekserý kezinde kóliktiń О́zbekstan Respýblıkasynda tirkelgeni anyqtaldy. Al kólikti atalǵan eldiń 1989 jylǵy turǵyny mas kúıinde júrgizgeni dáleldendi. Oǵan qatysty Ákimshilik quqyq buzýshylyq týraly kodeksi 608-babynyń 1-bóligimen (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý) ákimshilik hattama toltyryldy.
Atyraý oblysy