Tabıǵatty qorǵaý prokýratýrasynyń shara qoldanýymen Jetisý oblysynyń Panfılov, Qaratal, Aqsý, Sarqan aýdandary jáne Tekeli qalasynda kommýnaldyq qaldyqtardy shyǵarýdyń tarıfteri tómendetildi, dep jazady Egemen.kz oblystyq prokýratýranyń baspasóz qyzmetine silteme jasap.
«Prokýrorlar ýákiletti organdardyń úsh jyldan astam ýaqyt boıy máslıhatqa olardy bekitý úshin tarıfter usynbaǵanyn anyqtady. Qyzmet kórsetetin kompanııalar tarıfty óz betinshe belgilep, onyń somasyn 1 m3 1500 teńgeden 5000 teńgege deıin ósirgen.
Qadaǵalaý aktisi boıynsha atalǵan aýdandardyń turǵyndary úshin jańa tarıfter bekitildi, bul qyzmet aqysyn 2 esege, al keıbir jaǵdaılarda 10 esege tómendetýge múmkindik berdi. Osylaısha 100 myńnan astam tutynýshynyń, onyń ishinde 6 myń zańdy tulǵanyń múddesi qorǵaldy», delingen aqparatta.
Bul baǵyttaǵy jumystar aldaǵy ýaqytta oblystyń Alakól, Kerbulaq aýdandarynda da júzege asyrylady.