«Temirlan» seriktestiginiń taýarly-sút fermasyn salý jobasy qyzý qolǵa alyndy. Joba júzege assa, aýylda jańa jumys oryndary ashylyp, el eńsesin kóterýge septigin tıgizbek.
Astyqty aımaq turǵyndaryn sút ónimderimen qamtamasyz etý – óte ózekti másele. Bir qaraǵanda mal basy jetkilikti bolǵanymen, ónim óńdeýde qımyl shıraq emes. Ásirese, aýyl turǵyndarynyń baǵymyndaǵy iri qara maldyń ónimderin iske jaratý jaǵynda olqylyq bar. Bul tııanaqty atqarylsa, mal baqqanǵa da, ónimin óńdep, iske jaratqanǵa da paıdaly bolar edi. Ári Astana qalasyn azyq-túlikpen qamtamasyz etý beldeýindegi óńir dastarqanynyń berekesi kireri sózsiz. Dál qazir oblystaǵy iri eldi mekenderdiń azyq-túlik dúkenderinde untaqtan jasalǵan sút syńsyp tur. Al aqtyly mal ósirip otyrǵan óńir nege tabıǵı, taza sút ishpeske?
Jarqaıyń aýdanyndaǵy taýarly-sút fermasy osy zamanǵy saýý qurylǵylary ornatylǵan, 800 bas iri qaraǵa laıyqtalǵan ferma bolmaq. О́tken jyly dál osy fermanyń 400 basqa shaqtalǵan qurylysy aıaqtaldy. Bul jumysqa seriktestiktiń 700 mıllıon teńgeden astam qarajaty jumsaldy. Sút qabyldap alatyn jáne óńdeýden ótkizetin qurylǵylar ornatyldy. Jobanyń jalpy quny – 1,3 mıllıard teńge.
Seriktestik basshysy Erlan Alınniń aldyna qoıǵan josparyna qaraǵanda, sút óńdeý barysynda eń ozyq tehnologııa qoldanylyp, joǵary sapaǵa qol jetkizilmek. Mine, sonda ǵana eń kirpııaz tutynýshynyń talabyna jaýap beretin bolady. Bul jerde sút ónimderiniń san túri shyǵarylmaq. Tipti bul óńirde kezdese qoımaıtyn tańsyq asqa deıin bar. Eń bastysy, jańa jumys oryndary. Eki qolyn aldyna syıǵyza almaı otyrǵan aýyl turǵyndary turaqty tabysy bar, jumysshylarynyń bar jaǵdaıy jasalǵan eńbekke aralaspaq. Eń bastysy da osy emes pe?!
Sóz arasynda seriktestik týraly biraýyz sóz aıta ketelik. Ujym básekege tótep beretin berekeli istiń bastaý kózin ashqan. Ár jyl saıyn materıaldyq-tehnıkalyq bazasyn jaqsartyp, ártúrli ónim óndirip jatyr. Dıqandar bıdaı, suly, arpa egedi. Sondaı-aq kartop, qyryqqabat, sábiz, qyzylsha ósirý qalypty jaǵdaı. Bir aıta keterligi, joǵaryda atalǵan ónimderdiń barlyǵy eseli eńbektiń arqasynda táp-táýir ónim berip tur.
Qııandaǵy Tasótkel aýylynyń ýaqyt ótken saıyn sán-saltanaty artyp, ajarynyń aıshyqty bolýyna osy seriktestik úles qosyp jatyr. Jol jóndelip, aýyldaǵy bilim oshaǵy qurylysshynyń qalaǵynan jańa shyqqandaı jóndeýden ótkizilgen. Aýyl turǵyndarynyń turmysy qaladaǵydan kem emes. Seriktestik áleýmettik baǵdarlamalar men mádenıet salasyn qoldaýǵa ár jyl saıyn qyrýar qarjy bóledi. 24 jyldan beri bul aýyl aýdandaǵy eń sáýletti eldi mekenniń biri. Seriktestik basshysy Erlan Qınýarbekuly – aýdannyń qurmetti azamaty. Bul isker basshynyń eńbegine berilgen baǵa.
Búgingi kúni seriktestik tehnıka parkin jańǵyrtyp jatyr. Múmkindikteri bar bolǵan soń aýyl sharýashylyǵy tehnıkalarynyń eń sońǵy úlgidegi nusqalaryn alyp jatyr. Jaqsy jaraqtalǵan sharýashylyqtyń isi de ónimdi. Al isi alǵa basqan saıyn shalǵaıdaǵy shaǵyn aýyldyń dastarhany baı, mereıi ústem.
Aqmola oblysy,
Jarqaıyń aýdany