Sý sportynan Fılıppınniń Nıý-Klark-Sıtı qalasynda ótken Azııa chempıonatynda Qazaqstannyń júzýshileri tolaǵaı tabysqa qol jetkizdi. Atap aıtsaq, jerlesterimiz 20 altyn, 11 kúmis jáne 5 qola medaldi oljalady. Barlyǵy – 36 júlde!
Joǵarydaǵy kórsetkishtiń nátıjesinde Qazaqstannyń órenderi jalpy komandalyq esepte ekinshi oryndy ıelendi. Aldymyzda Japonııa quramasy. Kúnshyǵys eliniń ókilderi 36 altyn, 20 kúmis jáne 15 qolany enshiledi. Barlyǵy – 71 júlde. Al sary qurlyqtyń ózge alpaýyttary artymyzdan syǵalap qaldy.
Biz buǵan deıin otandastarymyzdyń alǵashqy kúnderdegi nátıjelerimen tanystyrǵan edik. Jarystyń sońǵy táýliginde Ádilbek Mýsın (50 metr, batterflıaı), Ksenııa Ignatova (200 metr, shalqalap júzý), Sofıa Spodarenko (50 metr, batterflıaı), Egor Popov (200 metr, shalqalap júzý), Sofııa Ábýbkirova (50 metr, batterflıaı) jáne Maksım Skazobsova (50 metr, batterflıaı) altyn alsa, Dıana Tasjanova (200 metr, shalqalap júzý) kúmispen kúpteldi. Arsen Qojahmetov (200 metr, brass) pen Danııl Cherepanov (100 metr, erkin tásil) qolaǵa qol sozdy. Bir aıta keterligi, dúbirli dodada otandyq júzýshilerimiz Azııanyń 14 jáne Qazaqstannyń 3 rekordyn jańartty.
Júzýshilerdiń jarysy aıaqtalǵan bette sýǵa sekirýshilerdiń saıysy bastaldy. Odan keıin artıstik júzý men sý dobynan básekeler ótedi. Azııa chempıonaty 9 naýryzda óz máresine jetedi.