Taıpeıde mánerlep syrǵanaýdan jastar arasyndaǵy álem birinshiligi óz máresine jetti. Jekelegen saıysta Qazaqstannyń týy astynda Oleg Melnıkov pen Ekaterına Balıýba óner kórsetti. О́kinishke qaraı, ekeýi de úlken synaqqa daıyn bolmaı shyqty.
Jarysty qyzdar bastady. Qysqa baǵdarlamanyń qorytyndysy boıynsha Ekaterına Balıýbanyń fınalıster qataryna qosylýǵa sheberlik deńgeıi jetpedi. Ol 46 sportshynyń arasynda 34-oryndy qanaǵat tutty. Sodan biz Oleg Melnıkovtyń jolyna úmitpen qaradyq. Biraq ol da senim údesinen shyǵa almady. Jattyǵýdyń alǵashqy túrinde 33-orynda qalyp qoıǵan jerlesimiz jarysty merziminen buryn aıaqtady.
Qyzdar saıysynda 15 jastaǵy japonııalyq Mao Shımada aldyna jan salmady. Ońtústikkoreıalyq Sın Djıa men Kúnshyǵys eliniń taǵy bir ókili Rena Ýedzono júldegeler sanatyna qosyldy. Erler básekesiniń bas júldesi Ońtústik Koreıaǵa ketti. Bul tartysta So Mıngıýdiń mereıi ústem boldy. Japonııalyq Fransýa Pıto kúmis alsa, slovakııalyq Adam Gagara qolaǵa qol sozdy.
Juptar arasyndaǵy jarysta grýzııalyq Anastasııa Metelkına men Lýa Berýlavanyń baq juldyzy jansa, amerıkalyq Olıver Flores pen Lıýk Vang jáne Namomı Ýılıams pen Laklan Lıýer úzdikter qatarynan kórindi. Sporttyq bıden ótken básekede AQSh-tyń asa daryndy jastary – Lııa Neset pen Artem Marelovqa teń keler eshkim tabylmady. Izraılden kelgen Elızabet Tkachenko men Alekseı Kılıakov ekinshi oryndy enshilese, nemis juby Darııa Grım men Mıhaıl Savıskıı úshinshi satyǵa turaqtady.