8 aqpan kúni aýyr qylmys jasap, kúdikke ilingen Qyzylorda oblysynyń alty turǵyny Astana – Pavlodar avtojolynda ustaldy. Olar tanystaryn eki kún boıy páterde qamap ustap, uryp-soqqan, dep jazady Egemen.kz.
Ishki ister mınıstrliginiń aqparatyna súıensek, uıymdasqan top eki tanysyn kúshtep kólikke otyrǵyzyp, páterde qarý-jaraqpen qorqytqan. Jábirlenýshilerdiń 300 myń teńge aqshasy men uıaly telefondaryn tartyp alǵan. Sonymen qatar taǵy bir mıllıon teńge talap etken.
Ustalǵandardyń biri qashpaq bolyp, besinshi qabattan sekirip ketken. Onyń aýyr jaraqat alǵany anyqtaldy. Kúdiktiler ekinshi jábirlenýshini kólikke otyrǵyzyp, izin sýytpaq bolǵan kezde qolǵa tústi. Bul fakti boıynsha Qylmystyq kodekstiń birneshe baby negizinde is qozǵaldy.
Sonymen qatar polısııa qyzmetkerleri Oralda tonaý, bopsalaý, alaıaqtyqpen aınalysqan kolledj stýdentterinen quralǵan qylmystyq topty ustady.
Atalǵan fakti boıynsha segiz qylmystyq is tergelip, kúdiktilerdiń basqa qylmystarǵa qatysy bar-joǵy anyqtalyp jatyr.
«Barlyq fakti boıynsha kúdiktiler ustaldy. Tergeý múddesine saı ózge aqparat jarııalanbaıdy. Qurmetti azamattar, eger sizder qylmystyq toptar tarapynan qol suǵýshylyqqa tap bolsańyzdar, dereý polısııaǵa habarlasyńyzdar. Biz sizdiń aqparatyńyzdyń qupııalylyǵyna kepildik beremiz jáne sizdi qorǵap, qaýipsizdigińizdi qamtamasyz etýge bar kúsh-jigerimizdi salamyz», dedi departament bastyǵy, IIM resmı ókili Shyńǵys Alekeshev.
Aıta keteıik, IIM jyl basynan beri 130-dan asa uıymdasqan qylmystyq toptyń áreketin toqtatty.