L.N.Gýmılev atyndaǵy Eýrazııa ulttyq ýnıversıteti men Abaı atyndaǵy Qazaq ulttyq pedagogıkalyq ýnıversıteti ózara yntymaqtastyq týraly memorandýmǵa qol qoıdy. Qujatty qos joǵary oqý ornynyń rektorlary Erlan Sydyqov pen Bolat Tilep bekitti.
Memorandým sheńberinde taraptar pedagog kadrlardy birlesip daıarlap, olardyń biliktiligin arttyryp, oqytýda tájirıbe almasyp, bilim berý standarttary men oqytý ádisterin ázirleýdi josparlap otyr. Sondaı-aq túlekterdi jumysqa ornalastyrý boıynsha birlesip jumys istep, bilim alýshylardyń kásiptik praktıkasyn júzege asyryp, birlesken bilim berý – ǵylymı is-sharalaryn iske asyrý kózdelgen.
«Áleýmettik-ekonomıkalyq damý máseleleri jónindegi keńeıtilgen keńeste Memleket basshysy: «Búgingi tańda damýdyń basty kilti bilim berý bolyp tabylady, biz ýaqyt talabyna barynsha beıim shyǵarmashylyq urpaqty tárbıeleýimiz kerek», dep atap ótken bolatyn. Bizdiń joǵary oqý oryndary arasyndaǵy seriktestikti damytý HHI ǵasyrdyń tulǵalary úshin qajetti daǵdylarǵa ıe jáne bilim berý keńistiginiń trendterine sáıkes keletin joǵary bilikti pedagogterdi daıarlaýdy jetildirýge baǵyttalǵan», dedi L.N.Gýmılev atyndaǵy Eýrazııa ulttyq ýnıversıtetiniń rektory E.Sydyqov.
Al Abaı atyndaǵy Qazaq ulttyq pedagogıkalyq ýnıversıtetiniń rektory B.Tilep elimizde pedagogterdiń jetispeýshiligine nazar aýdardy.
«Munyń bir sebebi – demografııalyq ósý, ásirese, Astana men Almaty sııaqty negizgi ortalyqtarda. Astana qalasynyń ákimimen kezdesýde 2024-2025 oqý jylyna elordadaǵy orta bilim berý mekemeleri úshin 600-den asa mamannyń qajettiligi týraly aıtyldy. Sondyqtan biz L.N.Gýmılev atyndaǵy Eýrazııa ulttyq ýnıversıtetimen jáne Astana qalasynyń bilim basqarmasymen memorandýmǵa qol qoıyp, tájirıbeden ótýge 180 stýdent jiberdik», dedi ol.
Aıta keteıik, Prezıdent tapsyrmasy aıasynda Eýrazııa ulttyq ýnıversıtetinde jeke pedagogıka fakýlteti ashylady. Osy rette atalǵan qos joǵary oqý orny «Arnaıy pedagogıka» birlesken bilim berý baǵdarlamasyn ázirleýdi josparlap otyr.