Aqordada Konstıtýsııany qabyldaýǵa arnalǵan saltanatty jıyn ótti. Memleket basshysy Qasym-Jomart Toqaev Qazaqstan Respýblıkasynyń Konstıtýsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýsııasyn iske asyrý jónindegi sharalar týraly» Jarlyqqa qol qoıyp, sóz sóıledi, dep habarlaıdy Egemen.kz.
Prezıdent óz sózinde jańa Ata zań eldiń damý baǵytyn aıqyndaıtyn tarıhı qujat ekenin atap ótti.
«Azamattarymyz tańdaǵan jańa Konstıtýsııa Qazaqstannyń jańa dáýirine jol ashady. Qazaqstan – aıaǵyna nyq turǵan, halyqaralyq bedeli bıik memleket. Elimiz ishki turaqtylyǵyn saqtap, ózge jurtpen dostyq qatynas ornatyp, zor senimmen alǵa qaraı qadam basyp keledi.
Endi memleketimiz damýdyń dańǵyl jolyna túsedi. Sondyqtan bizge tatýlyq pen dostyq, sabyrlyq pen tabandylyq, jasampazdyq pen uqyptylyq, eńbekqorlyq pen senimdilik aýadaı qajet. Bizdiń bıik maqsattarymyz, naqty josparlarymyz bar. Kóp sozbaı bárimiz osy mindetterdi iske asyrýǵa kirisýimiz kerek», dedi Memleket basshysy.
Prezıdent Halyq Konstıtýsııasynyń qabyldanýy jalpyulttyq birliktiń aıqyn kórinisi ekenin erekshe atap ótti.
«Shyn máninde, Halyq Konstıtýsııasyn ázirleý men qabyldaý jalpyulttyq birliktiń saltanat qurǵanyn, jańǵyrý strategııasy men reformalar jappaı qoldaý tapqanyn ańǵartady. Árıne, bul qujattyń tarıhı mańyzyna, qazirgi qoǵam men keler urpaq baǵa beredi. Al bizge memlekettilik jylnamasyn jazý mıssııasy júkteldi. Bul – abyroıly ári jaýapty mıssııa.
Sonymen birge azamattyq oı-pikiriń arqyly týǵan Otanyńnyń damý baǵdaryn belgileýge berilgen sırek múmkindikterdiń biri, taǵdyrdyń syıy. Sondyqtan bárimiz tarıhı ári uly betburystyń bel ortasynan tabylyp, taǵdyrsheshti sátke kýá boldyq dep senimmen aıta alamyz. Referendýmǵa qatysyp, azamattyq jaýapkershilik pen otanshyldyq tanytqan barshańyzǵa alǵys aıtamyn. Ásirese, jastarǵa shynaıy rızashylyǵymdy bildiremin. Jas býyn el jylnamasyna esimderin altyn árippen jazyp, Ata zań avtorlarynyń birine aınaldy.
Qazaqstannyń búgini men keleshegi jastardyń qolynda. Bul – eshqandaı uran emes, qarapaıym ómir zańy, memlekettik saıasatymyzdyń ózegi», dedi Qasym-Jomart Toqaev.
Buǵan qosa Prezıdent aldaǵy reformalardyń aýqymyna toqtalyp, júıeli ózgerister kezeńi bastalǵanyn aıtty.
«Aldymyzda aýqymdy jumys turǵanyn, biz memleketimizdi jan-jaqty jańǵyrtý jolyn endi ǵana bastaǵanymyzdy aıryqsha atap ótkim keledi.
Dúnıe dúrbeleńge tolyp, aınalamyzda turaqsyzdyq beleń alǵan jaǵdaıda bul joldy eńserýdiń ońaı bolmaıtyny anyq. Alaıda joldyń qıyndyǵyna qaramaı, alǵa qadam basýymyz kerek.
Ol úshin ultymyz aýyzbirshilik tanytyp, jaýapty ári jasampaz patrıotızmniń, tereń bilim men kásibıliktiń úlgisin kórsetýi qajet. Biz kózdegen maqsatymyzǵa jetemiz. Jeńimpaz bolýǵa mindettimiz!» dedi Memleket basshysy.
Prezıdent qol qoıǵan Jarlyq Ata zań normalaryn iske asyrýdyń negizgi baǵyttaryn aıqyndaıdy. Aldaǵy ýaqytta Parlament qaraýyna Prezıdent, Quryltaı, Halyq keńesi, Astananyń mártebesi jáne ákimshilik-aýmaqtyq qurylys týraly bes jańa konstıtýsııalyq zań usynylady. Sonymen qatar segiz konstıtýsııalyq zańǵa jáne 60-tan astam zańǵa ózgeris engiziledi.
Prezıdent: Jańa Halyq Konstıtýsııasy – keler urpaqpen birge jasaı beretin qasıetti qujat
Jańa Konstıtýsııa eldiń quqyqtyq, ekonomıkalyq jáne qoǵamdyq-saıası júıesin jańǵyrtyp, Qazaqstannyń damýyndaǵy jańa kezeńniń negizin qalaıdy.
Prezıdent Konstıtýsııany qabyldaýǵa arnalǵan saltanatty jıynǵa qatysty