Qazaqstanda búginde 286 mýzeı jumys isteıdi. Olardyń qorynda 4,5 mıllıonnan astam biregeı jádiger saqtalǵan. Jyl saıyn el mýzeılerine 6,5 mıllıonnan asa adam keledi. Bul turǵyndardyń tarıhqa, mádenıetke jáne ulttyq muraǵa qyzyǵýshylyǵy artyp kele jatqanyn kórsetedi, dep jazady Egemen.kz.
Mádenıet jáne aqparat mınıstrliginiń málimetinshe, mýzeıler endi tek tarıhı murany saqtaıtyn oryn ǵana emes, aǵartýshylyq, tárbıe jáne ulttyq biregeılikti nyǵaıtatyn zamanaýı mádenı ortalyqqa aınalyp keledi.
Sonymen qatar salada aýqymdy sıfrlandyrý úderisi júrip jatyr. Eldegi mýzeıler men qoryq-mýzeılerde zamanaýı elektrondy kirý júıeleri engizilip, biryńǵaı E-museum platformasy is júzinde búkil Qazaqstandy qamtyǵan.
Qazir bul júıege elimizdiń 20 óńirindegi 284 mýzeı qosylǵan. Sıfrlyq katalogqa mýzeı qorynyń 66 myńnan astam jádigeri engizilip, 750 úshólshemdi model jasalǵan. Sondaı-aq kelýshilerge 15 vırtýaldy týr qoljetimdi. Bul jobalar tarıhı murany jańa tehnologııalyq formatta tanystyrýǵa múmkindik beredi.
Premer-mınıstrdiń orynbasary – Mádenıet jáne aqparat mınıstri Aıda Balaevanyń aıtýynsha, mýzeıler birtindep zamanaýı ǵylymı-zertteý jáne bilim berý ortalyqtaryna aınalyp jatyr.
О́tken jyly ǵana respýblıkalyq mýzeılerde 1,5 myńnan astam is-shara uıymdastyrylǵan. Onyń ishinde 187 kórmeni shamamen 800 myń adam tamashalaǵan.
Sońǵy jyldardaǵy mańyzdy jobalardyń biri Qazaqstan Respýblıkasynyń Ulttyq mýzeıinde «Altyn Orda» zalynyń ashylýy jáne «Táýelsiz Qazaqstan» zaly ekspozısııasynyń jańartylýy boldy. Mınıstrlik mundaı bastamalar el tarıhynyń mańyzdy kezeńderin jańa qyrynan tanytýǵa múmkindik beredi dep esepteıdi.
Búgin, 18 mamyr kúni, elimizdiń barlyq óńirinde dástúrli «Mýzeı túni» aksııasy ótedi. Bul keshte mýzeıler men qoryq-mýzeıler kelýshilerge erekshe formattaǵy baǵdarlamalar usynady.
Mýzeı túni – ult tarıhyn urpaq júregine jaqyndatatyn joba
Qonaqtardy keshki ekskýrsııalar, ınteraktıvti kórmeler, shyǵarmashylyq kezdesýler, tarıhı kvester, teatrlandyrylǵan qoıylymdar, mýltımedııalyq jobalar, jaryq jáne dybys shoýlary, sondaı-aq jasandy ıntellekt elementteri qoldanylǵan baǵdarlamalar kútedi.
Budan bólek, kelýshiler qolónershilerdiń týyndylarymen tanysyp, ulttyq oıyndarǵa qatysyp, dástúrli taǵamdardan dám tata alady. Etnoaýyldarda rýhanı kezdesýler men kıiz úıdegi túngi shaı dastarhany uıymdastyrylady. Uıymdastyrýshylardyń aıtýynsha, bıylǵy «Mýzeı túni» de tarıh pen mádenıetke qyzyǵatyn myńdaǵan adamdy biriktirmek.