Álemdegi eń qymbat tehnologııalyq kompanııa sanalǵan Nvidia-nyń naryqtyq kapıtalızasııasy Germanııanyń ishki jalpy óniminen asyp tústi, dep habarlaıdy Egemen.kz.
Sońǵy jyldary tehnologııalyq alyptar men transulttyq korporasııalardyń ekonomıkalyq kólemi tez ósip keledi. Nvidia-nyń naryqtyq quny 2026 jyldyń mamyr ortasynda 5,7 trln dollarǵa jetti. Bul kompanııa qazir álemdegi úshinshi iri ekonomıka jáne Eýropadaǵy eń iri ekonomıka bolyp sanalatyn Germanııanyń ishki jalpy óniminen de asyp otyr. Halyqaralyq valıýta qorynyń málimetinshe (HVQ), eldiń jyldyq tabysy 5,45 trln dollardy quraıdy.
Nvidia – chıpteri vıdeoıyndardan bastap jasandy ıntellekt júıelerine deıin qoldanylatyn AQSh kompanııasy. Ol 2025 jyldyń qazanynda alǵash ret 5 trln dollar sheginen ótip, 2026 jyldyń mamyrynda 5,7 trln dollarǵa jetti.
Kompanııa buǵan deıin Japonııa men Ulybrıtanııanyń ekonomıkalyq kólemin basyp ozǵan, endi Germanııanyń 2026 jylǵa boljanǵan IJО́-sinen de asyp tústi.
Búginde naryqtyq quny 20,81 trln dollardy quraıtyn AQSh-tyń eń iri bes kompanııasy (Nvidia, Alphabet, Apple, Microsoft jáne Amazon) Eýropanyń bes iri ekonomıkasynyń (Germanııa, Ulybrıtanııa, Fransııa, Italııa jáne Ispanııa) IJО́-sinen (18,14 trln dollar) asyp túsken.
Aıta keteıik, osy aptada Aq úı basshysy Donald Tramp pen Sı Szınpın kezdesti. Bul kezdesýlerge Nvidia bas dırektory Djensen Hýang ta qatysty. Naýryzda ol jasandy ıntellektke suranys artsa, Nvidia satylymy aldaǵy eki jylda 1 trln dollarǵa jetýi múmkin ekenin aıtqan.
Buǵan deıin Premer-mınıstrdiń orynbasary – Ulttyq ekonomıka mınıstri Serik Jumanǵarın munaı óndirisi aqsamaǵanda, IJО́ ósimi 6%-dan asatyndyǵyn atap ótken edi.