Aqmola oblysy Esil qalasynda kólik jýý nysanynda Audi A6 kóliginen 28 jáne 29 jastaǵy eki er adamnyń denesi tabyldy, dep habarlaıdy Egemen.kz sinegor.kz saıtyna silteme jasap.
Oqıǵa 5 naýryzda bolǵan. Esil aýdandyq polısııa bóliminiń kezekshi bólimine tańǵy saǵat 07.45-te qala turǵynynan kólik jýý ornynda bir kólik turǵany jáne onyń ishinde eki ólgen adamnyń jatqany týraly habarlama túsken.
Polısııa olardyń kim ekenin anyqtady. Qaıtys bolǵandardyń biri - Esil aýdandyq ishki ister bóliminiń ýaqytsha ustaý ızolıatorynda jumys istegen polısııa serjanty. Ekinshisi – jergilikti turǵyn.
Aldyn ala málimet boıynsha, zorlyq-zombylyq belgileri tabylmady. Qazir oqıǵanyń mán-jaıy anyqtalyp jatyr.