Májilis depýtaty Edil Jańbyrshın Ǵylym jáne joǵary bilim mınıstrliginiń ǵylymdy bıýdjetten qarjylandyrý jumystaryndaǵy kemshilikterin atap, «Ǵylym jáne tehnologııalyq saıasat týraly» zań jobasyn synǵa aldy, dep habarlaıdy Egemen.kz.
Depýtattyń aıtýynsha, ǵylymdy bıýdjetten qarjylandyrý isinde ashyqtyq joq, bıýrokratııa, qıyndyqtar, ǵylymı keńes jumystarynyń kemshilikteri taǵy bar.
«Men keshe túnimen otyryp, qandaı esep berip jatyr eken dep osy ǵylymı keńes jumystaryn qaradym. Ulttyq ǵylymı keńes dep atalady, onshaqtysy bar. Qarap otyrsańyzdar, báriniń esebi – 4 bet. Tek statıstıka men ózderiniń múshelerin jazyp qoıǵan, eshqandaı taldaý joq. Qandaı ǵylymı jetistikter boldy, qaıda engizildi, qandaı taýarlar eksportqa shyǵarylady, qandaı taýarlar jetildirildi, qansha salyq tústi, qansha jumys orny ashyldy... eshqandaı málimet joq. Esepteri 3 betten turady, bári orys tilinde jazylǵan. Ne memlekettik, ne aǵylshyn tilinde materıal joq», dedi depýtat.
Edil Jańbyrshın ǵylymdy damytý úshin ǵalymdardyń ózderi damıtyn ortalar qurý kerek ekenin alǵa tartyp, sheteldik tájirıbedegi mysaldardy keltirdi.
Onyń aıtýynsha, «Ǵylym jáne tehnologııalyq saıasat týraly» zań jobasynda jaı ǵana Kommersıalızasııa men Ǵylym týraly eki zań biriktirilgen.
«Osyndaı zań bola ma?! Sondyqtan, mınıstr myrza, ekinshi oqylymǵa deıin mynanyń ishine qajetti nárselerdi kirgizýimiz kerek, jumys isteıtin zań bolý qajet. Áıtpese, bul «holostoı patron» bolady», dedi Edil Jańbyrshın.