Depýtat Erlan Saırov Májilistiń búgingi otyrysynda ana kapıtalyna nazar aýdaryp, urpaq órbitetin analardyń densaýlyǵyna qarjylaı qoldaý kórsetý maqsatynda bala týý jasyndaǵy áıelderge tisin emdetý úshin birrettik járdemaqy berýdi usyndy. Ol osy mazmundaǵy saýalyn Premer-mınıstrdiń orynbasary Tamara Dúısenovaǵa joldady, dep jazady Egemen.kz.
Depýtat keltirgen derekke súıensek, elimizdegi 543 myń kópbalaly ananyń barlyǵynda tistiń túsý problemasy bar.
«Elimizde uzaq merzimdi demografııany qamtý strategııasynyń bas aspektisi - laıyqty ana kapıtalyn qalyptastyrý. Ana júkti bolǵan kezde qursaqta balanyń qalyptasýyna kalsııdi kóptep jumsap, óziniń tisinen aıyrylatyndyǵy medısınalyq fakt. Qazaqstanda stomatologııalyq qyzmet aqysy kúıip turǵany barshamyzǵa belgili. Sondyqtan birinshi kezekte kópbalaly zárý analarǵa tisin jóndeý úshin birrettik qarjylyq tólem qalyptastyrý mańyzdy. Bala tapqan kelinshekterdiń densaýlyǵyn kútip, qalpynda ustap otyrýdyń memlekettik standarttaryn ázirleý kerek», dedi Erlan Saırov.
Májilis depýtaty ana bala bosanǵanda jasalatyn tólem tek balany kútýge bólinip, ana densaýlyǵyn qalypta ustaý úshin qarjy qarastyrylmaǵanyn aıtty. Bizdiń eldegi bala kútimine beriletin sommanyń mardymsyz ekenin alǵa tartyp, kórshiles Reseıde 1 balaǵa 639 myń rýbl - 3 mln 195 myń teńge, 2 balaǵa 883 myń rýbl - 4 mln 400 myń teńge beriletinin mysal retinde keltirdi.