Qońyr kúzdiń sońynda Kóksheniń oıy men qyryna ıen dalanyń erke ańy – elik tolyp ketti. Qys túse eldi mekenderge kire bastady. Kóktem shyǵa elik ataýly kádimgideı ótkir máselege aınalýy da múmkin.
Ań jaıyn biletin adamdardyń aıtýyna qaraǵanda, túp tórkini, súrleý izi Sibirden bastaý alatyn tárizdi. It tumsyǵy ótpeıtin Sibir ormandarynan údere kóshken degen joramal aıtylady. Bálkim ol jaqta da Arqadaǵy sekildi qys qabaǵyn túıip tur ma eken, kim bilsin?! Áıteýir, buryn-sońdy kezdese qoımaǵan tabıǵattyń tańǵajaıyp qubylysy. Áýeli áleýmettik jelilerde Jaqsynyń jalpaq dalasynan, Sandyqtaýdyń silemderinen túsirildi degen beınebaıan qaptap ketti. О́zimiz de kórdik. Tabyn-tabynymen júr. Adamdy oq jeter jerge jaqyndatpasa da, úrkip, údere qasha qoımaıdy. Qazir oblys ortalyǵynan taıaqtastam jerdegi О́zen aýylynyń mańynda úsh myńǵa jýyq elik qystap qalǵan. Bul bir ǵana mysal, ózge óńirlerdegi elikti sanaǵan eshkim joq.
Bıyl jalpaq dalada jan saqtaý qıyn. Qystyń basyn jaýyn jaýǵan. Synyqsúıem bolyp qatty. Kók muzdyń ústine kereqarys qar tústi. Ile dalanyń dıdary jipsip, oǵan sýly qar qosylyp, qaıta qatty. Bolat tuıaqty dep maqtaǵanymyzben jylqy ekesh jylqy da jurt jylǵy synaqqa shydamaıdy eken. Taı-jabaǵy bylaı tursyn, sińirli qutpan aıǵyr, kebeje qaryn bıe de tebinge jaramaı qaldy. Alaqandaı jerge bar jylqy úımelep, olardyń aýzynan qalǵan úsh tal qaý shópke myńdaǵan elik ortaqtasqan soń aýyl-aımaqtaǵy malsaq qaýym dala kórki – elikke ókpesi qara qazandaı bolyp otyr. Atarǵa oǵy joq. Bireý kıesinen, bireý aıyp pulyn salatyn ıesinen qaımyǵady.
– Bul dala qandaı beınet kórmedi, beli qaıysqanymen, úzilgen joq, – deıdi el aǵasy Esenbaı Káribaev, – dıqandarǵa obal bolady-aý. Erteń jer betine ózimen birge bar beınetti ala shyǵatyn egin kóktegen kezde támam elik josylyp, egistiktiń ústinen eki-úsh ret ótse, eńbegi esh, tuzdary sor bolmaı ma?
Shynynda da keıingi jyldary aýa raıynyń qolaısyzdyǵynan jarytyp ónim ala almaı otyrǵan aýyl sharýashylyǵy qurylymdarynyń besbatpan beınetin endi elik eseleıin dep tur ma, qalaı?
– Omby, Túmen mańyndaǵy áriptesterimiz Qazaqstannan qyrýar elik aýyp keldi dep otyr, – deıdi oblystyq orman sharýashylyǵy jáne janýarlar álemi aýmaqtyq ınspeksııasynyń basshysy Lashyntaı Dúısenov, – buryn-sońdy kezdese qoımaǵan tabıǵattyń jumbaq bir qubylysy. Bálkim jer aıaǵy keńigen soń ózderiniń baıyrǵy órisine, úırengen jerine aýyp keter dep úmittenip otyrmyz. Elikke erip, qasqyr da kelipti degen qaýeset jeldeı esedi. Taıaýda áleýmettik jelide Zerendi aýdanynyń Vıktorovka aýylynan túsirilgen beınebaıan kórsetildi. Ile bizdiń qyzmetkerler iz kesken. Jalǵan aqparat bolyp shyqty. Al eliktiń kóbeıgeni ras.
Kók shyǵa kósher degen úmit qana. Kóshpeı qalsa she? Aýyl-aımaqtaǵy malsaq qaýym azyn-aýlaq malyna jaıylym taba almaı otyr. Al sary dalada saǵymdaı esken erkin, azat ań aıdaǵanyńa júretin, aıtqanyńa kónetin synyqmúıiz qara sıyryń emes qoı. Oǵan qalaı ıe bolarmyz?
Aqmola oblysy