Memleket basshysy Qasym-Jomart Toqaev Saýd Arabııasy Koroldiginiń Energetıka mınıstri Abdýlazız ben Salman Ál Saýdty qabyldady, dep jazady Egemen.kz Aqorda baspasóz qyzmetine silteme jasap.
Kezdesý barysynda Qazaqstan men Saýd Arabııasy arasyndaǵy energetıkalyq jáne ınvestısııalyq yntymaqtastyqty damytý perspektıvalary talqylandy.
Qasym-Jomart Toqaev qazaq-saýd qatynastarynyń buryn-sońdy bolmaǵan deńgeıge jetkenin atap ótip, Saýd Arabııasynyń Taq murageri, Premer-mınıstri Muhammed ben Salman Ál Saýdpen aradaǵy ýaǵdalastyqtar barlyq sektorda ekijaqty yntymaqtastyqqa tyń serpin bergenin eske saldy.
«Sizdiń saparyńyzdy eki memleket arasyndaǵy dostyq pen tyǵyz baılanystardyń aıqyn kórinisi retinde qarastyramyz. Men sizdiń ǵajaıyp elińizge jasaǵan sapardan esten ketpes áser aldym. Sapar, shyn máninde, tabysty boldy. Biz kóptegen másele boıynsha, ásirese, energetıka sekildi mańyzdy salada yntymaqtastyq ornatý týraly ýaǵdalastyqtarǵa qol jetkizdik. Ekijaqty qarym-qatynastyń bolashaǵy jarqyn bolatynyna senimdimin. О́zara yntymaqtastyǵymyz strategııalyq sıpatqa ıe. Osy múmkindikti paıdalana otyryp, Joǵary Mártebeli Muhammed ben Salmanǵa izgi tilegimdi joldaǵym keledi», dedi Memleket basshysy.
Abdýlazız ben Salman Ál Saýd qurmet kórsetkeni úshin Qasym-Jomart Toqaevqa alǵys aıtty.
«Biz Qazaqstanmen aradaǵy tarıhı tamyry tereń qarym-qatynasty joǵary baǵalaımyz. Qazaqstan táýelsizdigin alǵan kezde Saýd Arabııasy kómek qolyn sozǵan alǵashqy elderdiń biri boldy», dedi mınıstr.
Budan bólek, kezdesýge qatysqan Saýdııanyń ACWA Power kompanııasy dırektorlar keńesiniń tóraǵasy Muhammed Abýnaııan Jetisý oblysynda qýaty 1 GVt bolatyn jel elektr stansııasyn salý jónindegi birlesken ınvestısııalyq jobanyń perspektıvalary, sondaı-aq Qazaqstanmen «jasyl» energetıka salasyndaǵy ózara yqpaldastyq jospary jaıynda aıtty.Kezdesý sońynda Qazaqstan Respýblıkasynyń Úkimeti men Saýd Arabııasy Koroldiginiń Úkimeti arasynda jel elektr stansııasyn salý jónindegi birlesken jobany iske asyrý týraly kelisimge qol qoıyldy.