Gúlnar Salyqbaı: О́leńge júrek pen shynaıylyq kerek

– Ádebıet álemine kelýińizge ne áser etti?

– Meniń ákem kitapty kóp oqı­tyn. Sheshem de jas kezinde kóp oqypty. Klassık jazýshylar­dyń aty-jónin eń aldymen sol kisi­den estidim. Onyń ústine Láıla degen ápkem kitaphana­shy boldy. Sabaqtan bos kezde kitaphanaǵa kirip alyp, qolyma túsken kitaptyń bárin shetinen oqı beretinmin. Týǵan jerim Jambyl aýylyndaǵy mektepte qazaq tili men ádebıetinen sabaq bergen Alpysbaı degen aǵamyz erkin taqyryptaǵy shyǵarmany kóp jaz­dyratyn. Osynyń bári áser etken shyǵar dep oılaımyn. Naǵyz ádebıetpen kezdesýim ýnıversıtetke túskennen keıin boldy. Qazir alyp tastapty, ol kezde jýrnalıstıka fakýltetinde qazaq, orys, shetel ádebıeti pánderi oqytylatyn. Muǵalimder mindetti túrde oqylýǵa tıisti shyǵarma­lar tizimin beredi. Sol kitaptar­dy, ol tizimde joqtaryn da ta­ýyp oqyp, Ulttyq kitaphanadan shyqpaıtynbyz. Tipti Aıym Ábdirasova degen kýrstasym ekeý­miz kúni boıy kitaphanada kitap oqyp, qaıtarda avtobýsta pikir talastyryp, jolda renjisip qa­latyn kezderimiz de bolǵan.

– «Jarasyn júregimniń tańa almadym,

Fánıdiń ý, balyna qana almadym.

Betim joq, Túrkistanǵa qalaı baram?»

О́zim túrkistandyq bolǵasyn ba, osy óleńińiz janyma jaqyn. Elimizdiń qaı jerleri sizge erekshe ystyq?

– Aldymen týyp-ósken jerim Zaısan ózime ystyq. Biraq ár jerdiń bir ózinshe tartymdylyǵy bolady ǵoı. Mysaly, Astananyń aspany unaıdy. Shymkentke kóp bardym, o jaqta Ǵazıza degen dosym bar. Aýa raıy qandaı bolsa, adamdary da sondaı, jyly jer. Elimizdegi eń qonaqjaı sol jaq shyǵar. Al Almaty týraly sóz bólek. Osy qalada eseıdim, oqydym, jastyq shaq, baqytty kezder ótken jerim ǵoı.

– Orys aqyny Nıkolaı Zabo­loskıı «poezııa tolyq bolýy úshin eń qajettisi MOM (mýzyka, obraz, mysl)», ıaǵnı áýen, obraz, oı dep edi. Al siz úshin poe­zııaǵa eń aldymen ne kerek?

– Júrek pen shynaıylyq kerek.

– «Kúlgen japyraq,

Jylaǵan japyraq,

Unaǵan japyraq,

Qulaǵan japyraq,

Ne oılaısyń tabannyń as­tynda jatyp ap», – deısiz. Me­nińshe, sizdiń súıikti mezgilińiz kúz sekildi?...

– Kúzdi unatatynym ras. Bi­raq meniń eń jaqsy kóretin mezgi­lim – qys. Ásirese qar jaýǵan kún­deri raqattanyp, úıge kirgim kelmeıdi. Bala kezimde biz jaqta qar óte qalyń jaýatyn. Aıaz qyryqtan asyp, sabaq bolmaı, úıde otyratynbyz. Sheshem marqum aıtatyn, ańdyp otyrmasa, men basyma birdeńeni jamyla salyp, dalaǵa shyǵyp ketedi ekenmin. Qardyń japyrlamaı, túıdektep quıyl­maı, qalyqtap, japalaqtap jaýa­tyn bir kezderi bolady ǵoı. Sony jaqsy kóremin.

– Anańyz qandaı adam edi?

– Sheshem marqum qyzyq adam bolatyn. «Qyzyqtarynyń» kóbi aıaq astynan olaı-bulaı bop ketsem, daıyndyǵym durys bolmaı qalyp, jurttan uıat bola ma degen qorqynyshtan týyndaıtyn. Jasy elýden asqanda dúnıeden ótken­de tusyna qurylatyn shymyldy­ǵyn, súıegine túskenderge beretin kıim-keshekterin daıyndaı bas­tady. Keıde sandyǵyn ashyp, ishindegilerin qaǵyp-silkip, qaıta salatyny bar edi. Sheshem sol zattar turatyn sandyqty asha qalsa, búgin-erteń aırylyp qalatyn­daı júregim zyrq ete qalatyn. Qorqyp, sol mańaıǵa barmaýǵa, tipti qaramaýǵa tyrysatynmyn. Men Almatyǵa oqýǵa ketkende anamyzdy ápkem Láıla qolyna alǵan. Bir kúni ápkem men jezdem sharýamen bir jaqqa jol júrip ketipti. Sheshem tańerteńgi shaıyn solarmen iship, qurt qaınatýdyń qamyna kirisedi. Biz jaqta irkit jınap, ol ábden ashyǵan soń baryp bir-aq qaınatady. Jáne kúni boıy oshaqtan ot úzbeı, aqyryn búlkildetip otyrý kerek. Ol úıdegi jalǵyz jumysy sol bolǵandyqtan, sharýasyna jan-tánimen berilip ketken sheshem keshke qaraı aıaq-qoly dirildep, álsireı bastaıdy. Tipti júre almaı qalady. Kúni boıy qaınatqan qurtyn dorbaǵa quıyp, ilýge ázer shamasy keledi. Sosyn ýaqytym bolǵan eken dep, jantalasa daıyndala bastaıdy. Eń aldymen tyrnaǵyn alady. Aıaq-qoly ázer ıkemge kelse de jýynyp-shaıynady. Tósek-ornyn, kıimin aýystyrady. Sosyn tósegine kózin jumyp, sozylyp jata qalady. Biletin duǵalaryn kúbirlep, sol jatqannan mol jatady. Ara-arasynda kózin ashyp, áli tirimin be degendeı jan-jaǵyna qarap qoıady eken. Kesh batqanda qyzy men kúıeý balasy keledi. Olar sheshemniń jatyp qalǵanyn kórip, shoshyp ketedi. Sosyn qyzy shaı qoıyp, bir shyny shaı ákep beredi. Bir qyzyǵy, shaı ishken soń shekesi jipsip, sheshemniń jaǵdaıy durystala bastaıdy, taǵy ishedi. Kıinip, ornynan tursa, jaǵdaıy jaqsy. Sóıtse, baıǵus sheshem kúni boıy qurt qaınatyp júrip, tamaq ishýdi umytyp ketipti. Álsirep, júre almaı qalýynyń sebebi sol ǵana eken…

– Shynynda, anańyz qyzyq adam eken.

– Iá, ol kisiniń mundaı qyzyq­tarynan bir kitap jazýǵa bolar edi.

– Siz saıaq júre­siz. Baýyr­jan Omarulynyń jazbasynda tomaǵa-tuıyq únsiz­digińiz sý­ret­teledi. Endigi suraq, Gúlnar aqyn kishkentaı kezinde tuıyq­taý bala boldy ma?

– Joq, kerisinshe kópshil boldym. О́zim quralyptas kórshiler­diń balalaryn jınap, konsert, spektakl uıymdastyryp júretin­min. Úıdiń kenjesi bolǵandyqtan ákem meni qatty erkeletti. Eshkim beti­ńe kelmegen soń belgili ǵoı, keıde ar­tyq ta ketip qalasyń. Bala kezde shashymnyń buıralyǵyna baılanysty «Dýdarbas» degen sııaqty biraz attarym bolatyn. Shashym kádimgi afrıkalyqtardyń shashyndaı, taraq batpaıtyn, usaq buıra edi. Sheshem tartyp, qatty qylyp órip qoımasa, bosap, endi bir bas qosylǵandaı kúmpıip, kóteri­lip ketetin. Uzyndyǵy belimnen keletin bul buıra shashty kútip-baptaý – sheshem baıǵus úshin úlken sharýa. Mektepke bararda ózi tarap, órip beretin. Jazǵy demalys­ta úlken aǵamnyń balalary biz­­diń úıde bolady. Olardyń eń bas­ty jumysy – balyq aýlaý. Biraq jylap, mazamyzdy alady deı me, úlken aǵamnyń bizdiń úıdegi ba­­lasy Muhtar ekeýmizdi ertkisi kelmeıdi. Bizdi jalyndyrǵandy qyzyq kórip, keıde ekeýi «balyq­qa barǵyń kelse, óıt-búıt» dep, neshe túrli talap qoıatyn. Bir kúni olar: «Shashyńa shybyn qamatsań, barasyń» dedi. «Qalaı?» dep em, «Qazir kóresiń», – dep, shybyn aýlaı bastady. Ekeýi ushyp bara jatqan shybyndy qarshyp ustap alady da, shashymnyń arasyna kirgizip jiberedi. Balyqqa barý úshin qandaı azap bolsa da shydaýǵa daıyn bolyp men tura­myn. Basymdaǵy shybyndar torǵa túskendeı typyrlap, tutasqan buıra shashtan yzyldap, shyǵa almaı, jantalasady. Úsh baýyrym ishin basyp, úsh jerde domalap kúlip jatyr. Biraq meniń kúlýge shamam joq. Basym jybyrlap, shybynnyń yzylynan qulaǵym tunyp barady, balyqqa aparamyz degen soń ázer shydap turmyn. Aqyry shydamaı ketip, eki qolymdy shashymnyń arasyna tyǵyp jiberip, silkilegende shybyndar ushyp shyǵa bastady. Bul kórinis olarǵa tipti qyzyq bolyp kórindi ǵoı deımin, qoldaryn shoshaıtyp, basymnan ushyp shyqqan shybyndardy qyzyqtap, ábden máz boldy. Mine, osyndaı qyzyqty jaıttar bolyp turatyn.

– Baýyrlaryńyzdyń ortasynda ósipsiz ǵoı.

– Iá. Úlken aǵamnyń balalary ǵoı, keńshar ortalyǵynda turdy. Biz sonyń bólimshesi – Jambyl degen aýyldamyz. Ol kezde kıno degendi bilmeımiz, televızor da kelmegen kez. Sovhoz ortalyǵynda turatyn aǵamnyń balasy Bóken biz úshin basqa ǵalamshardyń adamy sııaqty. «Qandaı kıno kórdiń? Aıtyp bershi» dep jalynamyz. Ol da birden jalp ete qalmaı, «Anany ákep ber, mynany sóıt, búıt» dep bizdi jumsap, biraz kisimsı­di. Aıtqanynyń bárin oryndap, Muhtar ekeýmiz kádimgi kıno kóre­tindeı Bókenniń qarsy aldyna jaıǵasyp alamyz. Ol áńgimesin bastarda kádimgi ártis sııaqty «ob­razǵa kirip», mańyzdanyp, ózgere qalady. Bókenniń áńgime­si kınodan bir de kem emes. Mý­zyka da ózi, róldegi ártis te ózi, myltyqtyń, pıstolettiń, pýle­mettiń atylǵanyn, bombanyń ja­rylǵanyn túgel dybystap beredi. «Aldymen jazý shyǵady» dep bas­taıdy. Sosyn «Nemistiń áskeri kele jatady» dep, «dih-dih, dih-dih» dep dybysyn salady. «Sosyn bomba jarylady. Býh! Snarıad jarylyp jatyr... chiiińńńńń, chiiiińńńń! Bir nemis myltyǵyn alyp, ata ber­gende oq tıip, qulap túsedi. Bdýh!» Bir qyzyǵy, Bókenniń áńgi­mesinde tek nemister ǵana óle­di. Keńes áskeriniń ólmegeni biz­ge de qatty unaıdy. Keıde qy­zyp, arqalanyp ketip, Bókenge qo­sylyp, nemistermen atysyp kete­miz. Bókenniń kórgen fılmi bireý-aq pa, álde kórgeniniń bári osyndaı ma, áıteýir barlyq áńgimesiniń mazmuny shamamen osylaı bolatyn.

– Maqtaý súımeıtin bala bolmaıdy ǵoı. O jaǵynan qandaı boldyńyz? Jalpy, ózińizdi maq­taǵandy unatasyz ba?

– Maqtaǵandy kim jek kórsin. Tek ol maqtaý ornymen, jónimen bolsa. Biraq biz maqtasaq ta, ja­mandasaq ta asyryńqyrap jibe­remiz ǵoı keıde. Meniń kishken­taı kezimdegi bir atym – Máı-apa. Bala kezimde tolyq boldym dep aıta almaımyn. Biraq sonda da mundaı atqa ıe bolýyma eń kóp «eńbek sińirgen» atam edi. Atam degenim ákem. Ol ózi kóp sóılemeıtin, kitap oqyp, ózimen-ózi otyratyn adam edi. Sondyqtan ba, atamnyń aýzyna iligip, odan maqtaý estý degen men úshin úlken dáreje. Alaıda qansha maqtaýly bolsam da, qatty qorqatyn nárselerim de az emes bolatyn. Ony eshkimge bildirmeýge tyrysamyn. Mysaly, mal soıǵan kezde úıden qashyp ketem. Malǵa janym ashıtyn bolýy kerek. Biraq soǵym soıǵan kezde kete al­maımyn. О́ıtkeni ol kúni atam soǵym soıýǵa, jas qýyrdaq jeýge kelgen aǵalar men atalardyń aldynda maǵan shıki maı ishkizedi. Maqtaýdyń kókesi de sol kúni! Ol kúni atam ǵana emes, bir qaýym el maqtaıdy! Jurttyń bári qarap turady.

Atam jylqynyń ish maıyn ýysyna toltyryp alyp, meni sha­qyrady. Men de jylyna bir ke­letin tarıhı sátti kútip, sol mańaıdy aınalsoqtap júrem. «Al, qarańdar, meniń balamnyń qandaı batyr ekenin kórińder»! deıdi. Sóıtip, shıki maıdy aýzyma taqaıdy. Isinen qusqym kelip tursa da kózimdi jumyp alyp, qylq etkizemin. Ol aradan shıki maıdyń dáminen júregim loblyp turǵanyn bildirmeı, syr bermeı ketýim kerek. Kelgen adamdar tań qalyp qaraıdy. Men bolsam, kún­de shıki maı iship júrgen adamsha «máz bolam». Maqtanshaqtyq degen qıyn ǵoı, keıde: «Ata taǵy ishsem qaıtedi?» dep qoıatynmyn. «Joq, balam, osy jetedi», dep kúledi atam.

«Máı apa» degen attyń jamalýyna sebepker bolǵan taǵy bir adam – marqum Jeken aǵam: «Maı bolmasa, Máı-apamnyń qarny ashyp qalady» dep kúlip júretin.

– Jazýshy Júsipbek Qor­ǵasbek: «Gúlnardyń óleńderine: «Qara qazan túbinde qaınap-qaınap, Dúnıeniń qyzyǵy sar­qylǵandaı» dep taýsyla aıtý tán» dep jazady. Shyn máninde, siz jazbaýǵa múmkindigińiz bol­maǵan kezde ǵana jazatyndaısyz.

– Ol ras. О́leńniń jazylýy da bir tylsym ǵoı. Qanat bitip, qalyqtap ushyp júrgendeı bola­syń. Ony túsindirip aıtý da qıyn. О́ziń de aqynsyń ǵoı. О́leń bolmasa, eshkim qutqara almaıtyndaı bir túsiniksiz kúıge túsesiń. Sondaı kezde ǵana jazamyn.

– Shyǵarmashylyqqa ózińiz­di to­lyq arnaı aldyńyz ba? О́ki­nishińiz bar ma?

– О́leńniń sanyn kóbeıtý úshin otyra qalyp, belgili bir ta­qyryptarǵa arnaıy jazǵan emes­pin. Olaı jaza qalǵannyń ózinde de basqa bireý jazǵandaı, bóten óleń shyǵady. Jazylatyn kezi bolady. Bolmasa, odan basqa da shyǵarmashylyq túrleri bar ǵoı. Kınoǵa, konsert, festıval­dar­ǵa ssenarıı jazdym, kóptegen aýdarma jasadym, kóp jyl televıdenıede bas redaktor boldym. Ol da shyǵarmashylyq ju­mys, sondyqtan ókinish joq. Shyǵar­manyń qundylyǵy sanynda emes, sapasynda shyǵar.

– Sizdi aqyn dep moıyndat­qan «Bir jutym aýa, qyzyl kún» tyrnaq­aldy jınaǵyńyzdan beri jastar arasynda kóp aıtylatyn «Jan», ózime erekshe áser etken «Tús», «Keshi­riń­der kelgenimdi ómirge» syndy kitap­taryńyz jaryq kórdi. Qaı kitabyńyz úshin erekshe qýandyńyz?

– Alǵashqy kitabyma. Men ózi qaǵazǵa onsha uqypty emespin. Osynyń kesirinen jazǵan nár­semniń talaıy joǵalǵan bolýy ­kerek. О́leńderim «Qazaq áde­bıeti», «Juldyz» sııaqty ádebı basy­lymdarǵa, jastardyń «Ja­lyn» jýrnalyna jarııalanyp, tanylyp qalsam da kitabym shyǵa­dy dep oılamappyn. Bir kúni Sol kezdegi «Jalyn» baspasy­nyń dırektory Seıdahmet Ber­di­qu­lov aǵa shaqyrtty. Baryp edim, aǵa jyly qabyldap, baspa kitabymdy kezeksiz shyǵarý­dy josparlap otyrǵanyn aıtty. «Bir jutym aýa, qyzyl kún» degen alǵashqy kitabym osylaı jaryq kórdi.

– Islam fılosofııasynda «kózdiń jasy kóńildi shaıady» degen pikir bar. Kóńilińizdi jıi jýasyz ba?

–  Ákemniń kitapty kóp oqıtyn adam bolǵanyn aıttym ǵoı. Ol kisiniń qaıtalap oqıtyn kitaptary bolatyn. Ilııas Jansúgirovtiń «Qulagerin» shesheme daýystap oqyp otyratyn. Oqyp otyryp:

«Qulager qulynynan dosym edi,

Baspanam – taýǵa tikken qosym edi.

Qandaı sor Ereımenge aıdap kelgen,

Qazańnyń jetken jeri osy ma edi?» –

degen jerine kelgende toqtap, keń­kildep, kúlgendeı me, jylaǵandaı ma bir dybys shyǵaryp, kózin súrtýshi edi. Ákem sııaqty kitap oqyp otyryp, kóńilim bosaıtyny bar. Mysaly, Muhtar aǵa­nyń (Maǵaýın) «Tazynyń ólimin» oqyǵan saıyn bir jylap alamyn. Keıde bir nársege qatty súı­singende de kózime jas keletini bar.

– Jaqsylyq jasaý degendi qalaı túsinesiz?

– Sheshem marqum: «Eshkimge jaman­dyq jasamasań, sonyń ózi – jaqsylyq» deýshi edi. Bireýge jaqsylyq jasap, paıdasy tıgen adamnyń ózi raqattanady ǵoı. Al eger jaqsylyq jasaǵan adam sony umyta almaı, kóńilinen shyq­paı qalsa, «osyǵan sondaı jaq­sylyq jasap em...» dep ókinish bildirgendeı bolyp, sanamalap aıta berse, ol jaqsylyq emes, esep. О́ıtkeni ol jaqsylyǵynyń qaıtarymyn kútedi. О́zi jaqsylyq jasaǵan adamynyń ómir boıy aldynda qurdaı jorǵalap júrge­nin qalaıdy. Al shyn júrekten jaq­sylyq jasaǵan adam ony sol kezde-aq umytyp ketedi.

– Gúlnar apaı, Maǵjan poe­zııany «jannyń sózi» dedi ǵoı. Biraq qazir jannan góri for­maǵa eligip ket­kendeımiz. Aqyn Esenǵalı Raý­shanov bir sózinde «Birneshe aqynnyń aty-jóni kór­setilmegen óleńderiniń ishi­nen Gúlnardyń óleńin jazbaı tanýǵa bolady» dep edi. Siz óz stılińizdi qalaı taptyńyz?

– Men oqyp júrgende, ol kez­de KazGÝ deıtinbiz, qazirgi QazUÝ-dyń jýrnalıstıka, fılolo­gııa fakýlteti­niń stýdentteri bári aqyn bolatyn. Marqum Qaırat Álimbek, Baýyrjan Úsenov, qazirgi qazaqtyń belgili aqyn­dary Svetqalı, Baýyrjandar bar. Polıtehnıkalyq ınstıtýtta Jánııa Eralıeva degen tamasha aqyn qyz boldy. Ol kezde jyr keshteri kóp bolatyn. Qalmaı baryp júremin, biraq ózimniń óleńderime kóńilim tolmaıtyn. Keıde durys óleń oqı almasam da jigitter qoımaı oqytatyn. Keıin «túsiniksiz, býaldyr jazady» degen sııaqty syn pikirler de estip júrdim. Ondaı jaǵdaı shynymen de bolǵan sııaqty. Birte-birte jazǵanyma syn kózben qaraýdy úırene bastadym. О́z jolyn izdeý, adasý degen jas adamǵa tán nárseler ǵoı. Boıymda joq qasıetterdi qoldan jasap, jaqsy kórinýge, jurttyń bárine unaýǵa tyrysqan joqpyn. Stıl – aqynnyń jan-dúnıesi, ómirge kózqarasy, minezi. Sondyqtan birte-birte qalyptasatyn tabıǵı nárse dep oılaımyn.

– Sizben derttengen, sizdiń sıqyrly álemińizge shomǵan jas býyn ósip-óndi. Al siz jas kúni­ńizde kimge eliktedińiz?

– Ony bilmeımin. Biz Tóle­gen, Muqaǵalı, Jumeken aǵala­rymyzdy pir tutatynbyz. Elik­tesek, eliktegen shyǵarmyz.

– Eger ǵaıyptan sıqyrly qus kelip, bir armanyńyzdy oryndaımyn dese, neni aıtar edińiz?

– Túkke turmaıtyn nárse­lermen aınalysyp, bosqa ótken ýaqytymdy qaıtarshy der edim...

– Esenǵalı Raýshanovtyń qazasyn estigende del-sal bolyp eseńgirep qal­ǵanymyz belgili. Onyń ústine sizdiń óleńińizdi oqyp, janymyz jylady. Sizge Esenǵalı aǵamyz «Jazýshy» bas­­pasynyń «Jyldyń úzdik aqyny» syılyǵyn bergeninen habardarmyz. Aramyzda ańyzǵa aınalǵan aqyndy eske alǵanda oıyńyzǵa alǵash ne oralady?

– Esenǵalı aǵany alǵash ret 1984-85 jyldary KazGÝ-degi jyr keshi­nen kórdim. Jas aqyndar­dyń óleń­derinen «Aýdıtorııa» degen jınaq quras­tyrylatyn bolyp, birneshe aqyn keldi. Biz óleń oqydyq. Keshten keıin óleńderimizdi tapsyrdyq. Jınaq shyq­qannan keıin Esenǵalı aǵa jigitterden sálem aıtyp, óleń suratypty. «Jalyn» jýrnaly­na. О́zi sonda qyzmet isteıdi eken. Jazǵandarymdy qarasam, jýr­nalǵa shyǵarýǵa laıyq emes sııaqty kórinip, kesheýildete ber­dim. Biraq aǵa qaıta-qaıta sálem aıtqan soń bir kúni toptamamdy aparyp berdim. Osylaı Esenǵalı aǵa jolymdy ashty. 90-jyldardyń basynda «Araı»-«Zarıa» degen jýrnalda jumys istedim. Esenǵalı aǵa eki tilde shyǵatyn sol jýrnaldyń jaýapty hatshysy eken. Ol kezde «Tatarka» degen jerde bir syz páterdi jaldap turamyz. Bir jótel ketpeı qoıdy. Ol kezde propıskań bolmasa, dáriger de qaramaıdy. Aqyly degen joq ol kezde. Esenǵalı aǵa meniń aýyryp júrgenimdi baıqap, Jazýshylar odaǵynan óz atynan Shyǵarmashylyq úıine joldama alyp, «dárińdi iship, biraz ýaqyt jyly jerde bol» dep meni sonda jiberdi. So jerden táýir bolyp shyqtym. Esenǵalı aǵa aqyn retinde qandaı dara, erekshe bolsa, adamdyǵy da sondaı edi...

– Saıahat jasaǵandy unatasyz ba? Saparda bolǵan qyzyqty oqıǵa­ńyz­ben bólisseńiz?

– Unatam. Balam Pragada oqyp júr­gende Eýropaǵa jıi baryp turdym. Talaı jerdi araladyq. Maǵan teńiz, ystyq jaq emes, salqyndaý, tarıhı jerleri bar elder unaıdy. О́zim sýdan qorqamyn. Balam oqý bitiretin jyly dıplom alý saltanatyna kıetin kostıým izdep dúkenge bardyq. Pragada ǵoı deımin. Balam kıip kóretin jerge kirip ketti, men bergi jaǵyn qarap júrgem. Bir ýaqytta qalaı bolǵanyn bileıin dep, balam jaqqa baraıyn desem, esikten bir áıel shyǵyp kele jatyr eken. Men jol berip, kútip tursam, ol da sóıtedi. Sosyn kúlip, ymdap, til bilmeımin ǵoı, «ótińiz» desem, ol da birdeńe dep ymdap, sóılegendeı bolady. Sol kezde maǵan qarap kúlip turǵan satýshy jigitke kózim túsip ketti. Sosyn esiktegi áıelge durystap qarasam, ózim. Esik degenim aına bolyp shyqty (kúldi).

– Shynaıy áńgimeńizge kóp rahmet.

 

Áńgimelesken –

Batyrhan SÁRSENHAN,

«Egemen Qazaqstan»