Aqtaý qalalyq sotynda «О́zenMunaıGaz» AQ dırektorynyń orynbasary K-ǵa qatysty qylmystyq is qaraldy, dep habarlaıdy Egemen.kz Mańǵystaý oblystyq sotynyń baspasóz qyzmetine silteme jasap.
Tergeý organy oǵan asa iri mólsherde zańdy kásipkerlik qyzmetke kedergi keltirdi (QK 365-babynyń 3-bóliginiń 2-tarmaǵy) degen aıyp taqty. Sondaı-aq onyń áreketteri aýyr zardaptarǵa ákep soqqany (QK 371-babynyń 2-bóligi) qosa aıtylǵan.
«Jaýapker K., «О́MG» AQ dırektorynyń munaı jáne gaz óndirý jónindegi orynbasary, sonymen qatar atalǵan kásiporynnyń konkýrstyq komıssııasynyń tóraǵasy bola tura, burǵylaý jumystaryna tender ótkizý kezinde ol belgili bir kompanııanyń múddesin qorǵap, basqa kompanııaǵa zııan keltirgen. Jaýapker K. «K» JShS jeńimpaz dep tanylǵan 2023 jylǵy 20 naýryzdaǵy tender qorytyndylary týraly hattamanyń kúshin joımaı, 2023 jylǵy 29 naýryzda dál sol lottar boıynsha tender ótkizý týraly zańsyz sheshim qabyldaǵan. K. óz áreketiniń zańsyzdyǵyn túsinip, «A» JShS-niń ótinishi áleýetti ónim berýshilerdiń talaptaryna sáıkes kelmeıtinin bile tura, óz ókilettikterin «A» JShS-niń múddelerin qoldaý maqsatynda paıdalana otyryp, 2023 jylǵy 29 naýryzda qaıtalama jınalys ótkizip, nátıjesi boıynsha barlyq 4 lot «A» JShS aýksıondaryna jiberý týraly sheshim qabyldandy», delingen sot anyqtamasynda.
Konkýrs qorytyndysy boıynsha baǵany barynsha tómendetken «A» JShS jeńimpaz dep tanyldy. Osylaısha, qyzmetterdiń jalpy quny 2,7 mlrd teńgeden astam somaǵa tómendetilgen. (QK 365-baby)
«Sonymen qatar jaýapker K., «О́MG» AQ men «AMSK» JShS arasynda jasalǵan sorǵy jáne kompressorlyq qubyrlardy jalǵa berý týraly shart talaptarynyń oryndalýyn teksermeı jáne qadaǵalamaı, oryndalǵan jumystar týraly aktilerge qol qoıyp, 21 749 456 mln teńge somasyndaǵy jaldaý aqysyn tóleýden ustaý sharalaryn qoldanbaı salǵyrttyq tanytqan», dep habarlady oblystyq sottyń baspasóz qyzmeti.
Osy tusta sottalýshynyń kinási jábirlenýshiniń, kýágerlerdiń aıǵaqtarymen, sarapshylardyń qorytyndylarymen, kepil hattarymen, atqarylǵan jumys týraly anyqtamalarmen, shot-faktýralarmen jáne basqa da is materıaldarymen dáleldengenin aıta ketý kerek.
Prokýror aıyptalýshyny joǵaryda atalǵan qylmystardy jasaǵany úshin kináli dep tanyp, qylmystardyń jıyntyǵyn negizge ala otyryp, 7 jylǵa bas bostandyǵynan aıyrýdy surady.
Sottalýshy óz kinásin moıyndamaı, aqtaýdy surady.
«Sot jeńildetetin mán-jaılar retinde sottalýshynyń kishkenteı balalarynyń bolýyn jáne turǵylyqty meken-jaıy men jumys oryndarynan oń minezdemesin eskerdi. Jaýaptylyqty aýyrlatatyn mán-jaı retinde, qyzmettik bapta jáne shartta kórsetilgen senimdi paıdalana otyryp, qylmystyq quqyq buzýshylyq jasaǵany tanyldy», delingen habarlamada.
Sot úkimimen K. QK-tiń 371- babynyń 2-bóligi, 365-babynyń 3-bóligi 2-tarmaǵy, 58- babynyń 3-bóligimen kináli dep tanylyp, ony ómir boıy munaı-gaz salasyndaǵy kommersııalyq uıymdarda basshylyq laýazymdardy atqarý quqyǵynan aıyryp, oǵan 6 jyl merzimge bas bostandyǵynan aıyrý jazasy taǵaıyndaldy.
Úkim zańdy kúshine engen joq