Mádenıet jáne aqparat mınıstri Aıda Balaeva Qýandyq Bıshimbaevtyń isi qaralyp jatqan sot zalyna jýrnalısterdiń kirgizilmeýine qatysty pikir bildirdi, dep habarlaıdy Egemen.kz.
Aıda Balaeva mınıstrliktiń árqashan jýrnalıst quqyqyn shekteýge jol bermeý, aqparatqa erkin qol jetkizýdi qamtamasyz etý jáne obektıvti aqparat taratý ustanymyn berik saqtaıtynyn atap ótti.
«Bul rette keshegi sot otyrysynda arnaıy orynnyń bolmaýyna baılanysty BAQ ókilderi sot otyrysyn belgilengen bólek bólmede otyryp kórdi. Alaıda BAQ ókilderine tıisti oryndar bolýy kerek. Osy jaǵdaıdy eskere otyryp, mınıstrlik múddeli memlekettik organdarmen birlesip, jýrnalısterdi qajet oryndarmen qamtý jumysyn júrgize bastaıdy», dep jazdy A. Balaev.
Mınıstr BAQ ókilderin sot prosesin jarııalaý kezinde birqatar etıkalyq aspektilerdi, atap aıtsaq, zań ústemdigin, beıtarap ádilettilikti eskerip, jalǵan aqparattyń taralýynan jáne kez kelgen formada sot qyzmetine aralasýdan saq bolýǵa shaqyrdy.
Aıta keteıik, 11-12 naýryzda Astana qalasynyń qylmystyq ister jónindegi mamandandyrylǵan aýdanaralyq sotynda eks-mınıstr Qýandyq Bıshimbaevtyń isi boıynsha aldyn-ala sot tyńdalymy ótti. Oǵan áıeli Saltanat Núkenovany óltirdi degen aıyp taǵyldy. Sottalýshy óz kinásin moıyndamaıtynyn aıtyp, alqabıler sotyn taǵaıyndaýdy surady. Sot onyń ótinishin qanaǵattandyrdy. Ashyq sot otyrysy 2024 jylǵy 27 naýryzda saǵat 10.00-de Astana qalasynda ótedi.