Prezıdent janyndaǵy negizgi konsýltatıvtik-keńesshi organ retinde Ulttyq quryltaı qoǵam, zııaly qaýym ókilderi jáne sarapshylar qaýymdastyǵyn memleketshildik máselelerdi bir arnaǵa biriktiretin dıalog platformasynyń tıimdi úlgisin qalyptastyryp, damytyp keledi.
Quryltaı otyrystarynda Prezıdent aldynda ózekti suraqtardyń sheshimin talqylaý formaty – qoǵam men memleket arasyndaǵy nátıjeli dıalog júrgizýdiń jaqsy úlgisi. Munda qoǵamnyń ózekti máseleleri talqylanady. Máselen, ótken jylǵy jıynda kitaphana isin damytý, oqý saýattylyǵyn arttyrý, tárbıe jumysynyń qundylyǵy talqylandy.
Memleket basshysy Quryltaıda «Zań jáne tártip» qaǵıdatyn adam quqyqtaryn qorǵaýdaǵy basty ustanymy retinde aıtqan bolatyn. Búginde osy qaǵıdat barlyq zańnamalyq bastamada irgeli negiz retinde aıqyndalyp otyr.
Ulttyq quryltaı aıasynda talqylanǵan keıbir máseleler depýtattyq bastamalar negizinde zańnamalyq deńgeıde sheshimin taýyp keledi. Mysaly, Quryltaıda kóterilgen kitaphanalardyń qyzmetin jaqsartý, oqýshylar men jastar arasynda kitap oqýdy damytýǵa baǵyttalǵan Memleket basshysynyń tapsyrmalaryn oryndaý maqsatynda depýtattar «Qazaqstan Respýblıkasynyń keıbir zańnamalyq aktilerine bilim jáne mádenıet máseleleri boıynsha ózgerister men tolyqtyrýlar engizý týraly» zań jobasyn ázirledi. Búginde bul qujat boıynsha Májiliste jumys toby quryldy.
Barshańyzǵa belgili, Memleket basshysy «Bilim jáne tálimgerlik týraly» zańǵa qol qoıdy, onyń aıasynda mekteptegi bilim, tárbıe jumysynyń birqatar máselesi sheshildi. Naqtylap aıtsaq, endi, mektepter jáne balabaqshalar josparlanbasa, kópqabatty turǵyn úıler salynbaıdy. Sondaı-aq memlekettik mektepter men kolledjderdi jekeshelendirýge tyıym salyndy. 30 jyldan astam paıdalanylǵan mektep, balabaqsha jáne kolledj ǵımarattary ár 5 jyl saıyn apattylyq qaýpi boıynsha tekseriledi.
Birinshi synypqa qabyldaý úshin emtıhan ótkizýge tyıym salyndy. Bul – balalarymyzǵa teń bilim múmkindikterin júzege asyrý úshin ózekti norma.Sabaq kezinde uıaly telefondardy paıdalanýdy shekteý týraly arnaıy norma da jobaǵa engizildi. Norma tek sabaq kezindegi shekteýlerge qatysty. Bala telefonyn mektepke ákelip, úzilis kezinde paıdalana alady. Bul turǵyda eshqandaı shekteý joq. Sabaq kezinde bala tek oqýmen aınalysýy kerek.
Sonymen birge Túrkistanda ótken Ulttyq quryltaıda Prezıdent Qasym-Jomart Toqaev veıp jáne túrli elektrondy temekilerdi ult saýlyǵyna qaýip tóndiretin kesel dep atap ótti. Ol elektrondy temekiniń bárine qoljetimdi jáne onyń zııansyzdyǵy týraly túrli jarnamanyń kóbeıip ketkenine alańdaýshylyq bildirdi. Memleket basshysy osy qaýipti úrdispen kúresý úshin júıeli jáne shuǵyl sharalar qabyldaý qajet ekenin aıtqan bolatyn.
Májilis depýtattary veıp jáne elektrondy temekilerdiń suıyqtyǵyna, olardy taýar retinde engizýge jáne onyń aınalymyna tolyq tyıym salý týraly norma qabyldady. Bul da Ulttyq quryltaı aıasynda ultymyzdyń keleshegi jastarymyzdyń densaýlyǵy úshin sheshimin tapqan ózekti suraq.
Qoǵamnyń barlyq salasyndaǵy osyndaı kúrdeli máseleler Ulttyq quryltaıdyń negizinde júıeli ári nátıjeli sheshimin taýyp keledi. Oǵan mysaldar kóp. Depýtattyq korpýs Ulttyq quryltaıda kóterilgen suraqtardyń jaýabyn zańnamalyq negizde sheshilýde odan ári eńbek ete beredi.
Juldyz SÚLEIMENOVA,
Májilis depýtaty