Atyraýda Prezıdenttiń tóraǵalyǵymen Ulttyq quryltaıdyń úshinshi otyrysy ótip jatyr, dep jazady Egemen.kz.
Prezıdent óz sózin Atyraý oblysynyń tarıhı máni men strategııalyq mańyzyn túsindirýden bastady.
«Uly Jibek Jolynyń boıynda turǵan qala bir kezderi aıryqsha geostrategııalyq ról atqarǵan. Batys pen Shyǵystyń ekonomıkalyq, saıası, mádenı qarym-qatynasyna erekshe yqpal etken. Ataqty handarymyz osy jerge ordasyn tigip, el bılegen. Birqatary Saraıshyqta máńgilik mekenin tapqan. Tarıhshylardyń paıymdaýynsha, Qazaq handyǵyn qýatty memleketke aınaldyrǵan Qasym han osynda jerlengen. Bir sózben aıtsaq, Saraıshyq – tól shejiremizde aıryqsha orny bar kıeli shahar», dedi Qasym-Jomart Toqaev.
Memleket basshysy Ulttyq quryltaı jıyndarynda túıitkildi máseleler kóterilip, sheshimin tabý jolynda is atqarylyp jatqanyn atap ótti. Ult bolý jolynda ulttyq qundylyqtar júıesin qalyptastyrýǵa nazar aýdardy.
«Quryltaı – eshqashan toı toılap, áńgime-dúken quratyn jıyn bolǵan emes, keleshekte de ondaı bolmaıdy. Aldyńǵy eki otyrysta elimizdi damytýǵa qatysty mańyzdy bastamalar kóterildi. Onyń birazy oryndaldy. Jalpy ózgerister barlyq salada bolyp jatyr», dedi Prezıdent.