Rýdnyıda Naýryznamanyń mádenıet jáne ulttyq salt-dástúr kúnine oraı «Dástúrimniń balqaımaǵy – ájeler» baıqaýy ótti. Saıysqa qatysýshylar qazaqtyń kóneden kele jatqan ulttyq salt-joralǵylaryn kórsetip, olardyń mán-maǵynasyn ashyp áńgimelep berdi.
«Qazaq analary – dástúrge jol» respýblıkalyq qoǵamdyq qory muryndyq bolǵan is-sharaǵa Rýdnyı qalasynyń ákimdigi, jergilikti kásipker Janat Baıdollaeva, respýblıkalyq «Otandastar» qorynyń oblystyq fılıaly, qalalyq ardagerler uıymy qoldaý kórsetti.
Baıqaýdyń saltanatty rásiminen soń kópshilik aldyna aq kımeshek kıip-aq qazdaı tizilip shyqqan ájeler sahnaǵa ózgeshe sán bitirip, is-sharanyń ózara saıystan góri merekelik lebi basym ekenin aıqyn sezdirgendeı boldy. Saıysqa qatysýshylar ózin tanystyrý, ulttyq taǵam daıyndaý, turmystyq salt-dástúrge baılanysty sahnalyq kórinis qoıý kezeńderi boıynsha synǵa tústi. Kórermender árbir qoıylymǵa erekshe yqylas bildirip, qoshemet kórsetip otyrdy.
«Memleket basshysy Qasym-Jomart Toqaev ulttyq salt-dástúrlerimizdi dáriptep, nasıhattaýdy jaqsy jolǵa qoıyp otyr. Elimizdiń barlyq óńirlerinde osy merekelik onkúndik jappaı qolǵa alynyp, urpaqqa ulaǵat qaldyrarlyq is-sharalar ótip jatyr. Biz de osy bastamaǵa atsalysý úshin ákimniń qabyldaýynda bolyp, óz usynysymyzdy aıttyq. Ol kisi birden qoldaý bildirdi. Bul – boıjetip qalǵan qylyqty qyzdarymyz, úıdegi kelinderimiz ulttyq mádenıetimizge, ádepke, ata-babamyzdan mura bolyp qalǵan salt-dástúrlerimizge bet bursa, burynǵy ájelerimizden kórgenin umytpasa degen nıetpen jasalyp jatqan dúnıe. Sondyqtan budan ári baıqaýdyń mazmunyn keńeıtip, jyl saıyn jańǵyrtyp dástúrli túrde ótkizip otyrý oıda bar», deıdi baıqaýdy uıymdastyrýshy Nınagúl Pýshaeva.
Saıysqa túsken ájelerdiń aldy búginde nemeresin úılendirip, shóbere súıip otyr. Soǵan qaramastan árqaısy óziniń ár nárseni de uqsata biletin ámbebap ekenin dáleldep baǵyp, jún tútip, jip ıirdi, ıne sabaqtap, keste tikti, balany besikke bólep, sábıdiń tusaýyn kesip, qudaǵa qurmet kórsetip te úlgerdi. Ene men kelinniń jarasymyn, abysyn arasyndaǵy tatýlyqty, qaıyn ata, qaıyn aǵa, qaıyn inige qurmet kórsetýdiń tamasha úlgisin, qonaq kútýdiń jol-joralǵysyn kórsetip, onyń jónin tápishtep túsindirip bergen ájelerdiń ishinde osaly joq. Sodan bolsa kerek, qazylar alqasy da saıysqa túskenderdiń eshbirin eskerýsiz qaldyrmaýdy uıǵarǵan syńaıly. Baıqaý qorytyndysy boıynsha qatysýshylar «Asyl áje», «Bulbul áje», «О́negeli áje», «Bilimpaz áje», «Qoly altyn áje» atalymdary boıynsha marapattaldy.
Qostanaı oblysy,
Rýdnyı qalasy