19 sáýirde Almatyda aralas jekpe-jekten OCTAGON 57 týrnıri ótedi. Oǵan elimizdiń jáne birqatar shet memleketten kelgen sportshylar qatysady. Keshtiń basty básekesinde Súndet Aıtqul (7-1) men Haıtao Tı (14-5) kúsh synasady. Qandasymyz úshin bul aıqastyń ońaıǵa soqpaıtyny anyq. О́ıtkeni Qytaı faıteri óte qarýly. Ol óziniń 14 jeńisiniń barlyǵynda qarsylasyn esinen tandyrdy. Sondaı-aq Damır Tólenov pen Sıý Lýnnyń básekesi kórermender kóńilinen shyǵady degen oıdamyz.
2024 jyldyń 10-15 qyrkúıek aralyǵynda ótetin tennısten Devıs kýboginiń toptyq týrnırin qabyldaıtyn qalalar anyqtaldy. Bul básekelerdiń shymyldyǵy Italııanyń Bolonıa, Ulybrıtanııanyń Manchester, Ispanııanyń Valensııa jáne Qytaıdyń Chjýhaı shaharlarynda túriledi. Al atalǵan jarystyń jerebe tartý rásimi 19 naýryzda ótedi.
Qazaqtyń tanymal jekpe-jek sheberi Oljas Esqaraev Bahreınniń BRAVE CF promoýterlik kompanııasymen kelisimshartqa otyrdy. Azııa boıynsha úzdikterdiń biri sanalatyn uıymda óner kórsetý úshin ár sportshy úshin úlken mártebe. Máselen, kezinde BRAVE CF-da kúsh synasqan Asý Almabaev bul kúnderi UFC-de tabysty óner kórsetýde.
Fýtboldan Qazaqstan ulttyq quramasy men «Beshıktash» klýbynyń jartylaı qorǵaýshysy Baqtıer Zaınýtdınov Túrkııa chempıonatynda óner kórsetetin burynǵy postkeńestik elder arasyndaǵy eń qundy oıynshy bolyp tanyldy. Transfermarkt portalynyń málimetinshe, jerlesimizdiń transferlik quny 6 mıllıon eýrony quraıdy. Ekinshi jáne úshinshi oryndarda – «Kaıserıspordyń» jartylaı qorǵaýshysy, ózbekstandyq Otabek Shúkirov (2,5 mln) pen «Hataıspordyń» shabýylshysy, ázerbaıjandyq Renat Dadashov (2 mln). Al Túrkııa sýperlıgasynda «Adana Demırspordyń» namysyn qorǵap júrgen Qazaqstannyń taǵy tanymal bir aıaqdop sheberi Abat Aıymbetov 800 myń eýroǵa baǵalandy.