Naýryznama onkúndigi aıasynda Senat tóraǵasy Máýlen Áshimbaev bastaǵan bir top depýtat elordadaǵy múgedektigi bar balalarǵa arnalǵan ońaltý ortalyǵynyń qyzmetkerlerimen jáne emdelýshilerimen kezdesti.
Máýlen Áshimbaev óz sózinde atalǵan ortalyqtyń birneshe jyldan beri erekshe qajettilikteri bar balalardy damytý jáne ınklıýzıvti qoǵam qalyptastyrý jolynda belsendi jumys istep kele jatqanyna nazar aýdardy. Sondaı-aq Palata spıkeri bul máselege Memleket basshysy únemi basa mán berip otyrǵanyn atap ótti. El Prezıdentiniń tapsyrmasymen Qazaqstanda múmkindigi shekteýli azamattardy qoldaý jáne kedergisiz orta qurý baǵytynda aýqymdy jumys atqarylyp, berik ınstıtýsıonaldyq negiz qalyptasyp keledi.
«Qazirgi tańda elimizde múmkindigi shekteýli jandarǵa qoldaý kórsetý, olardy áleýmettik qorǵaý baǵytynda keshendi jumys júrgizilip keledi. Kedergisiz, ınklıýzıvti orta qalyptastyrý – memleketimizdiń aldynda turǵan mańyzdy mindetterdiń biri. Prezıdent Qasym-Jomart Toqaevtyń tapsyrmasymen elimizde erekshe qajettilikteri bar eresekter men balalardyń ortaǵa beıimdelýine, olardyń sapaly bilim men medısınalyq qyzmet alýyna, sportpen shuǵyldanýyna jáne jumyspen qamtylýyna qajetti jaǵdaı jasalyp jatyr. Sondaı-aq Parlament Senaty da múgedektigi bar azamattardyń quqyqtaryn qorǵaýdy kúsheıtý jáne turmys sapasyn jaqsartý salasynda tıisti sharalar qabyldap keledi», degen Máýlen Áshimbaev Palata janynan múmkindigi shekteýli jandarǵa qoldaý kórsetý maqsatymen qurylǵan Inklıýzııa jónindegi keńestiń qyzmetine toqtalyp ótti.
Kezdesý barysynda senatorlar estý, sóıleý, kórý, aýtızm spektri jáne basqa da aýytqýlary bar balalardy oqytýdyń arnaıy jobalarymen jáne mamandandyrylǵan ádistemesimen tanysty. Osy rette ortalyqta ınteraktıvti bólmeler, arnaıy ázirlengen damytýshy jabdyqtary bar sensorlyq-dınamıkalyq zaldar jumys isteıtinin atap ótken jón.
Ortalyq basshylyǵynyń aıtýynsha, qazirgi tańda bul jerdiń esebinde 200 bala jáne psıhonevrologııalyq patologııasy bar 42 eresek adam bar. Mekemeniń negizgi mindetteriniń biri – belsendi ómirlik pozısııa men balalardyń ózine-ózi kómektesý daǵdylaryn qalyptastyrý jáne olardyń jan-jaqty damýyna yqpal etý. Osyǵan baılanysty estý qabileti buzylǵan 20-ǵa jýyq adam, odan bólek, múmkindigi shekteýli bala tárbıelep otyrǵan ata-analardyń ózderi ortalyqta aspaz, tárbıeshiniń kómekshisi bolyp eńbek etedi. Bul áleýmettik beıimdelý men damý úshin qolaıly atmosfera qalyptastyrýǵa yqpal etedi.
Ortalyqtyń ujymyn jáne tárbıelenýshilerin Naýryz meıramymen quttyqtaǵan Máýlen Áshimbaev Memleket basshysynyń bastamasymen bıyl atalǵan mereke Naýryznama-2024 tujyrymdamasy aıasynda jańa formatta atalyp ótip jatqanyn aıtty. Mundaı qadam ulttyq biregeılikti nyǵaıtýdy kózdeıdi. Kórisý kúninen bastalǵan Naýryznamanyń ár kúniniń ataýy men mán-maǵynasy bar. Soǵan sáıkes búgin, ıaǵnı 19 naýryz – Jańarý kúni ekeni belgili. Bul tabıǵattyń jańarýymen qatar tutas qazaqstandyq qoǵamnyń jańǵyrýyn da bildiretin mánge ıe.