Qorǵanys mınıstri general-polkovnık Rýslan Jaqsylyqovtyń basshylyǵymen «Ońtústik» óńirlik qolbasshylyǵynda Qarýly kúshterdiń komandalyq quramymen kóshpeli jedel keńes ótti.
Onyń jumysyna Qarýly kúshter túrleriniń bas qolbasshylary, ásker tekteriniń, óńirlik qolbasshylyqtar áskerleriniń qolbasshylary qatysty. Qorǵanys mınıstrliginiń, Bas shtabtyń jáne Qarýly kúshter qurylymdyq bólimsheleriniń bastyqtary beınekonferensbaılanys rejıminde qosyldy.
Keńeste Qarýly kúshter Qurlyq áskerleriniń 2024 jyldyń birinshi toqsanyndaǵy qyzmetiniń qorytyndysy shyǵaryldy. Qurlyq áskerleri bas qolbasshysynyń orynbasarlary tıisti baǵyttary boıynsha baıandama jasady.
Jaýyngerlik jáne jumyldyrý daıyndyǵynyń jaı-kúıi taldanyp, ony jetildirý sharalary usynyldy. Taktıkalyq býyn ofıserleriniń kásibı jáne komandırlik daıarlyǵynyń jaǵdaıy qaraldy. Aýmaqtyq qorǵanys bólimsheleriniń daıyndyǵyn uıymdastyrý máselelerine nazar aýdaryldy.
Áskerı tártip pen quqyqtyq tártipti arttyrý jóninde atqarylǵan jumystyń qorytyndysy aıtyldy. Odan ózge materıaldyq quraldardy saqtaýdy uıymdastyrý jáne olardyń saqtalýyn qamtamasyz etý týraly da qozǵaldy. Qarý-jaraq, áskerı tehnıka men oq-dárilerdi saqtaý oryndaryn jetildirý sharalary qaraldy.
Qurlyq áskerleriniń bas qolbasshysy general-maıor Asan Júsipovtyń jalpy qyzmettik is-qımyl týraly baıandamasy tyńdaldy. Bas qolbasshy problemalyq máselelerge nazar aýdardy. Budan bólek ol sany jaǵynan Qarýly kúshterdiń eń kóp túriniń qyzmetiniń tıimdiligin arttyrýǵa baılanysty usynystaryn aıtty.
Qorǵanys vedomstvosynyń basshysy Qarýly kúshterdiń áskerı jáne turǵyn úı-kommýnaldyq ınfraqurylymyn damytý perspektıvalary týraly aıtyp berdi. Ol kazarmalyq qordy qalpyna keltirý, Saryózek garnızonyndaǵy tank polkiniń parkin jaılastyrý jáne jabdyqtaý jónindegi jumystardyń jaqsy júrgizilip jatqanyn atap ótti.
Qorytyndylaı kele qorǵanys mınıstri ofıserler quramy men kelisimshart boıynsha áskerı qyzmetshiler úshin áleýmettik-turmystyq jaǵdaı jasaýdy birinshi orynǵa qoıý kerek dedi. Ol garnızonda QR Qarýly kúshteri Ulttyq áskerı-patrıottyq ortalyǵynyń fılıalyn ashýdy tapsyrdy.
«Garnızonnyń áskerı bólimderi iri eldi mekenderden alysta ornalasqan. Sondyqtan, biz, ózimiz áskerı qyzmetshilerdiń balalaryna arnalǵan mádenı-demalys is-sharalaryn ótkizý, kınolar kórsetý, úıirmeler men seksııalar uıymdastyrýǵa qoldaý kórsetýimiz kerek. Jeke quramnyń jaýyngerlik rýhy osy faktorlarǵa tikeleı áser etedi», dep atap ótti general-polkovnık Rýslan Jaqsylyqov.
Budan ózge ol jergilikti atqarýshy bılik ókilderimen, aýdandyq jáne oblystyq máslıhat depýtattarymen áskerı ınfraqurylym obektilerin jóndeýge, paıdalanýǵa, jastarǵa áskerı-patrıottyq tárbıe berý jumystaryn júrgizýge baılanysty máselelerdi sheshýde ózara qarym-qatynasty barynsha qoldaý qajettigin málimdedi.