Eks-mınıstr Qýandyq Bıshimbaevqa qatysty negizgi sot prosesi ashyq túrde ótip jatyr, dep habarlaıdy Egemen.kz.
Aıyptaýshylardyń aıtýynsha, 2023 jyldyń jaz mezgilinde Bıshimbaev Núkenovaǵa Almatyda turýǵa usynys jasaǵan. Al Saltanat kúıeýi oǵan degen sezimin ózgertedi degen úmitpen usynysqa kelisken.
«Saltanat turǵylyqty jerdiń ózgerýi Bıshimbaevtiń oǵan degen kózqarasyn ózgertedi, sonymen qatar fızıkalyq jáne psıhologııalyq kúızeliske ushyratýyn toqtatady degen úmitpen kóshýge kelisedi. Alaıda, Bıshimbaev óziniń qylmystyq áreketterin Almatyda da jalǵastyrǵan. 2023 jyldyń tamyz aıynda Núkenova Bıshimbaevtyń júıeli túrde uryp-soǵýyna shydaı almaı Pavlodardaǵy ata-anasynyń úıine barady. Alaıda Bıshimbaev keshirim surap, Saltanatty qaıtyp kelýge kóndiredi. Osydan keıin Núkenova Bıshimbaevty tastap ketýge birneshe ret árekettengen, biraq Bıshimbaev óziniń ózgeretine ýáde bere otyryp, ony qaıtaryp alatyn», dedi prokýror.
Aıta keteıik, sot prosesi onlaın rejımde Joǵarǵy Sottyń áleýmettik jelidegi paraqshasynan kórsetilip jatyr.