Aqmola oblysynda ýaqytsha jumyssyz jastardyń sanyn azaıtýǵa baǵyttalǵan semınar uıymdastyryldy. Tórt kúndik semınar barysynda NEET sanatyndaǵy 200 jasqa kásipkerlik daǵdylar úıretildi.
Jastar «Jumys izdeý daǵdylaryn arttyrý», «Kásipkerlik daǵdylaryn jetildirý» jáne «NEET jastarynyń sıfrlyq daǵdylaryn arttyrý» taqyryby aıasynda biliktiligin shyńdady. Eńbek naryǵy trendterin zertteı otyryp, túıindeme men ilespe hat jazý tájirıbesin, áńgimelesýden sátti ótýdiń mashyqtaryn da úırendi. Oǵan qosa jumys tabýǵa bolatyn platformalarmen jiti tanysty.
– Semınarǵa 14-35 jas aralyǵyndaǵy jastar qatysty. Bul – Ekologııalyq qor men Azamattyq bastamalardy qoldaý ortalyǵynyń birlesken jobasy. Kýrs baǵdarlamasy jastardyń tilekterin eskere otyryp ázirlendi. Tyńdaýshylar kásibı mamandardan, sondaı-aq tálimgerler men kásipkerlerden qundy tájirıbe jáne aqparat aldy. Jalpy, kýrstarǵa jańadan bastaǵan jáne jumys istep jatqan kásipkerler de qatysa alady, – dedi Qazaqstannyń Ekologııalyq qorynyń basshysy Aıgúl Abdýalıeva.
Ulttyq statıstıka bıýrosynyń deregin eskersek, elde 15 pen 34 jas aralyǵyndaǵy NEET jastardyń úlesi 2023 jyldyń 3 toqsanynyń qorytyndysy boıynsha 7,1 paıyzdy quraıdy. Memleket bıyl eki qolǵa bir kúrek tappaı sendelgen otandastarymyzdy eńbekke baýlý maqsatynda biraz is-sharalardyń basyn júıelegen. Máselen, elimizdiń 20 óńirinde «Zhas project» jobasy iske qosyldy. Baǵdarlama aıasynda azamattarǵa konkýrstyq negizde 1 mln teńgege deıingi somaǵa shaǵyn grant berý kózdelgen. Osylaısha, 280 joba iske asyrylatyn bolady.
«25 naýryzda uıymdastyrýshy, operator, múddeli seriktesterdiń ınternet-resýrstary men áleýmettik jelilerinde konkýrstyń bastalýy jarııalandy. 25 naýryzdan bastap 24 sáýir kúngi saǵat 23:59-ǵa deıin jastardan ótinimder qabyldanady. 25 sáýir men 14 mamyr aralyǵynda komıssııa konkýrstyq ótinimderdi irikteý jumystaryn júrgizedi. 15 mamyrda uıymdastyrýshynyń ınternet-resýrstary men áleýmettik jelilerde irikteý nátıjeleri qorytyndylanady. Jobaǵa qatysýshylar óz aımaǵyndaǵy áleýmettik máselelerdi sheshýge baǵyttalǵan tıimdi bastamalardy júzege asyryp, sonymen qatar kóshbasshylyq qabiletin de damyta alady. Jastar áleýmettik jáne kásibı baǵdarlaý boıynsha jańa bilim men daǵdyǵa ıe bolady. Bıznes qurý jáne júrgizý boıynsha kásibı mentorlyq qoldaý ala alady», dedi Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov.
Is-shara sońynda qatysýshylarǵa arnaıy sertıfıkattar tabystaldy. 20 jasqa jeke konsýltasııa berildi. Endi mundaı kýrstar Qostanaı jáne Qyzylorda oblystarynda uıymdastyrylmaqshy. Sondaı-aq qor respýblıka boıynsha jastar resýrstyq ortalyqtarynda jumyspen qamtý, kásipkerlikti damytý materıaldarynan turatyn aqparattyq-tanymdyq buryshtar ornatýdy kózdep otyr.