Almaty men Iаroslavl qalalary dárigerleriniń megapolıste sırek kezdesetin aıaq-qol keselderimen týǵan 8 balaǵa jasaǵan operasııasy sátti ótti. Bul balalardan da bólek, uqsas dertteri bar 60 shaqty kishkentaı pasıent bilikti dárigerlerdiń qabyldaýynda boldy.
15–16 naýryz aralyǵynda Almatydaǵy №2 qalalyq balalar klınıkalyq aýrýhanasynyń bazasynda belgili reseılik hırýrgter Maksım Vavılov pen Tımýr Torno birigip, «Mıkrohırýrgııa arqyly aıaq-qoldyń týabitti jáne júre kele paıda bolǵan kinárattaryn jedel emdeý» taqyrybynda sheberlik dárisin ótkizdi. Mundaı múmkindikti Almaty, Taldyqorǵan jáne Bishkek qalalarynyń dárigerleri de jibermeı, tájirıbe almasýǵa keldi.
«Sheberlik dárisin «Meıirimdilik úıi» qoǵamdyq qory bas seriktesimiz «Samruk-Kazyna Trust» áleýmettik jobalardy damytý qorynyń qoldaýyna súıene otyryp, derti aýyr balalarǵa kómek kórsetý úshin ári aýrýhanadaǵy medısınalyq kómektiń sapasyn arttyrý maqsatynda uıymdastyrdy. Bastama aıasynda 60 shaqty bala tekserýden ótip, em-dom taǵaıyndaldy, 8 balaǵa operasııa jasaldy. Kúrdeli operasııanyń ekeýi – «sımýltantty», ıaǵnı bir mezette adamnyń birneshe jerine jasalatyn aralas operasııa», dedi Almaty №2 QBKA dırektory Marat Rabandııarov.
Taǵy bir toqtala ketetin oqıǵa – Qonaev qalasynan jetkizilgen 9 jastaǵy Adınaǵa 2 dárigerlik top – mıkrohırýrgter men ortopedııalyq travmatologter bir mezette kúrdeli operasııalar jasady. Búldirshin narkozda jatqan kezde aıaq-qolymen qosa, buǵanasyna úsh birdeı operasııa jasady. Naýqasqa «oń jaq gemıparezi, serebraldy sal aýrýy» dıagnozy qoıylǵan.
Aıtqandaı, 2023 jyly 13 qańtarda Adınaǵa osy №2 qalalyq balalar klınıkalyq aýrýhanasynyń bazasyndaǵy neırohırýrgııalyq sheberlik dárisi kezinde Berlındegi áıgili Sharıte klınıkasynyń professory Ýlrıh-Vılgelm Tomaleniń tikeleı aralasýymen mıdyń sol jaq bóligine biregeı operasııa jasalyp, osydan keıin búldirshinniń jaǵdaıy jaqsaryp, dirili toqtaǵan. Almaty men Iаroslavl dárigerleri jasaǵan bul jolǵy operasııa Adınany saýyqtyrý jolyndaǵy kelesi qadamǵa aınalyp otyr.
«Bala aýrýhanaǵa josparly túrde qabyldandy, biraq operasııadan tórt kún buryn qyz oń ıyǵymen qulaǵan. Turǵylyqty jeri boıynsha travmatıkalyq pýnktke aparǵan kezde oǵan «oń jaq buǵanasynyń ortańǵy úshten bir bóliginiń jabyq synýy» dıagnozy qoıylyp, dezo gıpsi salynǵandyqtan, oń qolǵa da operasııa jasaý máselesi týyndady. Tekserýden keıin dárigerlerdiń eki toby bir ýaqytta aıaqqa, buǵanaǵa, jilinshik pen saýsaqqa birlesken «sımýltantty» operasııa jasaýǵa sheshim qabyldady. Osylaısha, bir mezette Adınaǵa oń jaq buǵananyń jabyq osteosıntezi, shyntaqtaǵy jiliktik júıkeniń qozǵaltqysh talshyqtarynyń selektıvti neırotomııasy, sińirlerdiń transpozısııasy, oń jaq asyqasty býynynyń artroerezi dıagnozdaryna operasııa jasaldy», dedi Almaty №2 QBKA travmatolog dárigeri Uljan Soltanbekova.
Al joǵaryda atalǵan 8 bala «birneshe artrogrıppoz», «aıaqtyń kavýstyq deformasııasy», «Sharko – Marı aýrýy», «atıpti maımaqtyq», «resıdıv», «ONMK saldary», «sol jaq gemıparezi», «sol jaq aıaqtyń valgýsy», «oń qoldyń deformasııasy» sııaqty kúrdeli operasııalardy ótkerdi.
Sheberlik dárisi aıasynda qoldanylǵan «bos teri plastıkasy» tehnologııasyna toqtalatyn bolsaq, dástúrli ádister tıimsiz bolǵan jaǵdaıda dárigerlerge kúrdeli mıkrohırýrgııalyq ádisterge júginýge týra keledi.
«Mıkrohırýrgterdiń mindetine kelsek, oǵan birden júginýdiń qajeti joq, bul basqa ádister kómektespegen kezde qoldanylady. Jaraqat alǵannan keıin túrli jara paıda bolyp, ortopedter men travmatologter olardyń barlyǵyn kez kelgen tásilmen jabýǵa tyrysady, jergilikti tinderdi tartady, bul «bos teri plastıkasy» nemese «qaıtalama jazylý» dep atalady. Eger barlyq tásil kómektespegen jaǵdaıda bos terini jyljytyp, qan-tamyr aınalasyn tigip, jaralardy jabý kerek. Mundaı operasııa barysynda esh jerdi jaraqattamaý, zaqymdap almaý syndy aýyr mindet turady», deıdi hırýrg Tımýr Torno.
Eń bastysy, balalarǵa jasalǵan barlyq operasııa, em-dom tegin júrgizildi.
ALMATY