Senatta Bas prokýratýra janyndaǵy Quqyq qorǵaý organdary akademııasymen birlese otyryp quqyqtyq bilim berýdiń sapasyn arttyrý jáne odan ári damytý máselelerine arnalǵan ǵylymı-tájirıbelik konferensııa ótti.
Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Nurlan Beknazarov konferensııada senatorlardyń elimizdegi zań bilimin damytý máselesine erekshe nazar aýdaryp otyrǵanyn atap ótti.
«Sot jáne quqyq qorǵaý júıelerin reformalaý, sondaı-aq ulttyq zańnamany damytý jaǵdaıynda elimizge zamanaýı talaptarǵa sáıkes keletin bilikti zańgerler qajet. Sebebi quqyqtyq tártip pen azamattardyń konstıtýsııalyq quqyqtary men bostandyqtaryn sapaly qorǵaý, bilikti zańgerlerdi daıarlaý deńgeıine tikeleı baılanysty. Senat depýtattary osy máselege erekshe nazar aýdaryp keledi, sondyqtan sońǵy eki jylda bilim máselesine qatysty birqatar shara ótkizdi», dedi senator.
Bas prokýratýra janyndaǵy Quqyq qorǵaý organdary akademııasynyń rektory Marat Seksembaev konferensııaǵa qatysýshylarǵa saladaǵy negizgi problemalar týraly aıtyp berdi. Olardyń qatarynda joǵary oqý oryndarynyń kommersııalyq maqsattary, teorııalyq kýrstardyń basym bolýy, oqytýshylar quramynyń álsizdigine baılanysty problemalar jáne basqa da máseleler bar.
Ǵylym jáne joǵary bilim mınıstri Saıasat Nurbek konferensııa taqyryby boıynsha negizgi baıandama jasady. Ol mınıstrliktiń joǵary zań bilimi salasyndaǵy memlekettik saıasatty iske asyrý jónindegi qyzmeti men tıisti joǵary oqý oryndarynyń jumysy týraly qatysýshylardy habardar etti. Al Joǵarǵy sot janyndaǵy Sot tóreligi akademııasynyń rektory Záýresh Baımoldına oqý oryndarynyń problemalaryna nazar aýdaryp, ǵalym-oqytýshynyń jalaqysyn kóterý men mártebesin arttyrýǵa nazar aýdarý qajet ekenin atap ótti.
Konferensııa barysynda O.E.Kýtafın atyndaǵy Máskeý memlekettik zań ýnıversıtetiniń birinshi prorektory Inna Ershova, Reseı IIM Volgograd akademııasynyń professory O.Dronova, M.S.Nárikbaev atyndaǵy QazǴZÝ rektory S.Pen, Ál-Farabı QazUÝ zań fakýltetiniń dekany D.Baıdeldınov jáne basqalar sóz sóıledi.
Nurlan Beknazarov ǵylymı-praktıkalyq konferensııa jumysyn qorytyndylaı kelip, depýtattar aıtylǵan barlyq usynysty muqııat zerdeleıtinin, keıinnen salalyq memlekettik organdardyń atyna jiberý josparlanyp otyrǵan usynymdar tizbesine engiziletinin atap ótti.