«QazAvtoJol» AQ tórt oblystaǵy respýblıkalyq mańyzy bar bes jolda erigen qar sýy tas joldan asyp ketkenin habarlady, dep jazady Egemen.kz.
Abaı aýdany:
Qaraǵandy - Aıagóz - Tarbaǵataı - Boǵaz tas jolynda (707-den 941 shaqyrymǵa deıin) jeńil avtokólikter úshin qozǵalys shekteldi. Aıta keteıik, joldyń 878 jáne 923 shaqyrymynda dıametri 1 metr bir núkteli qubyr men eki aralyqty kópir bar.
«Joldyń ótý múmkindigin saqtaý úshin fılıal mamandary jol jıekterin nyǵaıtý, qap konteınerlerin ornatý jáne jasandy jaǵalaýlar jasaý jumystaryn júrgizip jatyr. Jumysqa 7 tehnıka jumyldyryldy, onyń ishinde júk tıegishter, samosvaldar jáne avtogreıderler bar», dep túsindirdi «QazAvtoJol».
Aqtóbe oblysy:
Qandyaǵash – Embi – Shalqar – Yrǵyz tas jolynda (288 shaqyrym) sý tasqyny boldy. Bul aýmaqta dıametri 1,5 metr bolatyn bir núkteli sý ótkizgish qubyr bar.
«Sýdyń odan ári aǵyp ketýine jol bermeý úshin 650 qum salynǵan qap qoıylyp, qosymsha 480 tonna qum jetkizildi.Tasýdyń saldaryn joıý úshin bes jol jumysshysy, úsh birlik mamandandyrylǵan tehnıka (MTZ, tıegish, KamAZ) jumyldyryldy», dep habarlady jol qyzmetkerleri.
27 naýryz kúni saǵat 20:15-ten bastap Qandyaǵash – Embi – Shalqar – Yrǵyz tas jolynyń 3-shi shaqyrymynan 92-shi shaqyrymyna deıingi ýchaskede kóliktiń barlyq túri úshin qozǵalysqa shekteý engizildi.
Sondaı-aq búgin tańǵy saǵat 8:00-den bastap Samara-Shymkent jolynyń ýchaskesinde (526-shy shaqyrymnan 618-shi shaqyrymǵa deıin) jeńil avtokólikter qozǵalysyna ýaqytsha shekteý engizildi.
«Sýdyń odan ári aǵýyn boldyrmaý úshin 200 qum salynǵan qap qoıylyp, qosymsha 40 tonna qum jetkizildi. 5 adam men 2 tehnıka jumyldyryldy. Sondaı-aq joldy nyǵaıtýǵa 110 tonna qum jáne 450 qum salynǵan qap daıyndaldy. Sýdy shyǵarýǵa 15 adam men 7 tehnıka jumyldyryldy», dep túsindirdi «QazAvtoJol» baspasóz qyzmeti.
Qostanaı oblysy:
Jezqazǵan – Petropavl tas jolynyń 269-shaqyrymynda (Jazǵyztal kentinen 28 shaqyrym) sý tasqyny boldy. Bul aımaqta dıametri 2,5-ten 2 metrge deıin úsh núkteli tútik qubyry bar. Kólik qozǵalysyna shekteý qoıylmaǵan. Degenmen, jolǵa ýaqytsha ózgerister engizý úshin ýaqytsha jol belgileri men baǵanalar ornatyldy. Jol tósemin oqshaýlaý úshin kólemi 150 tekshe metr bolatyn ınertti materıal (usatqysh, qıyrshyq tas) daıyndaldy. Úsh tehnıka men toǵyz adam jumyldyryldy.
Ulytaý oblysy:
Aqshataý – Ortaý – Bıdaıyq tas jolynda (189-shy shaqyrym – Bıdaıyq aýyly) erigen sý tasqyny jol tóseminen asyp ketti. Bul aımaqta dıametri 70 santımetr bolatyn bir núkteli qubyr bar. Kólik qozǵalysyna shekteý joq.
«Qazirgi ýaqytta jyljymaly apattyq jol belgilerin ornatý jumystary júrgizilip jatyr. Tórt tehnıka men bes adam jumyldyrylǵan. Jalpy, respýblıkalyq mańyzy bar joldarda túrli jumystardy júrgizý jáne qaýipsizdikti qamtamasyz etý úshin 610 birlik tehnıka men 1558 adam jumyldyrylǵan», dep atap ótti vedomstvo ókilderi.
Qyrmyzy JUMAǴALIQYZY,
EUÝ stýdenti