Amerıkalyqtar Jetisýdyń bilim salasyna grant bólýge nıetti. Sonymen qatar kásipke áýes qyz-kelinshekterge járdemdesýge ynta bildirip otyr. Al oblys basshylyǵy qatty qaldyqty óńdeýge ınvestısııa quısa, jer bólip berýge jaǵdaı jasaıtynyn jetkizdi. Oblys ákiminiń orynbasary Áset Qanaǵatovpen AQSh-tyń Qazaqstandaǵy elshisi Denıel Rozenblıým bastaǵan delegasııa kezdesýinde osyndaı máseleler kóterildi.
Jetisý óńirinde shetel ınvestısııasyn tartý baǵytynda birqatar is-shara qolǵa alynyp jatyr. AQSh elshisimen bolǵan kezdesýde de bul másele jan-jaqty pysyqtaldy.
Oblys ákiminiń orynbasary Á.Qanaǵatov buǵan deıin de AQSh ókilderimen bolǵan resmı kezdesýlerdiń jalǵasy retinde bul júzdesýdiń ekijaqty áriptestik baılanystardy nyǵaıtýǵa yqpaly bolatynyna senim bildirdi. Oblys ekonomıkasyndaǵy basym baǵyttar, ınvestısııalyq múmkindikter jaıly baıandady. Sol sııaqty amerıkalyq qonaqtardyń osy jolǵy jumys sapary negizinen bilim berý salasyna baǵyttalǵandyqtan, bul salada da ózara bilim men tájirıbe almasýǵa múmkindikter bar ekenin jetkizdi.
О́z kezeginde Denıel Rozenblıým myrza jetisýlyq stýdentterge AQSh-tyń bilim granttaryn berý, sol sııaqty isker áıelderge qoldaý kórsetý jaǵynan baılanysty jandandyrý týraly sóz qozǵady. Oblystyń ınvestısııalyq múmkindigi týraly málimetterdiń AQSh ınvestorlary úshin paıdaly bolatynyn aıtty.
Kezdesý barysynda oblys ákiminiń orynbasary Marlen Kólbaev bilim berý, densaýlyq saqtaý, IT salalaryna maman daıarlaýda áriptestik baılanys ornatýdyń múmkindikteri týraly baıandady. Al Taldyqorǵan qalasynyń ákimi Ernat Bázil qaladaǵy turmystyq qatty qaldyqtardy tereń óńdeý, ıaǵnı qaldyqsyz óńdeý isine ınvestısııa salatyn kompanııalar bolsa, zań sheńberinde jer ýchaskesin bólý, ınfraqurylym júrgizý sııaqty naqty qoldaýlar kórsetiletinin jetkizdi.
Qos qarap ta aıtylǵan málimetter negizinde ekijaqty baılanystardyń jańa kókjıegine jol ashylatynyna senim bildiristi.
Aıta keteıik, Denıel Rozenblıým bastaǵan resmı delegasııa Jetisý oblysyna kelgen jumys sapary barysynda I.Jansúgirov atyndaǵy Jetisý ýnıversıtetinde halyqaralyq qatynastar baǵytynda oqıtyn stýdenttermen kezdesý ótkizip, budan keıin Kóksý aýdany Jarlyózek aýylynda amerıkalyq grant baǵdarlamasymen ashylǵan «Ochaq» turaqty damý ortalyǵynda boldy.
Jetisý oblysy