Parlamentte «Bir el – bir múdde» depýtattyq toby músheleri men Qazaqstan halqy Assambleıasy ókilderiniń kezdesýi ótti. Kezdesýge depýtattyq top jetekshisi – Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip tóraǵalyq etti. Senator óz sózinde Memleket basshysynyń tapsyrmasy boıynsha «Bir el-bir múdde» alańy qurylǵanyn jáne ol ulttyq birlik pen áleýmettik kelisimdi nyǵaıtýǵa baǵyttalǵanyn atap ótti, dep habarlaıdy Egemen.kz Senattyń baspasóz qyzmetine silteme jasap.
«Bizdiń depýtattyq top jumysynyń maqsaty – Prezıdent qoıǵan mindetterdi sapaly oryndaý sheńberinde syndarly alań qalyptastyrý. Depýtattyq top qurylǵan kúnnen bastap azamattyq qoǵam ınstıtýttarymen áleýmettik kelisim jáne ulttyq birlik, elimizdegi ultaralyq qatynastardy úılestirý salasynda birqatar mańyzdy ister atqaryldy. Kezdesýler, semınarlar, keńester ótti. Búgingi is-sharany bizdiń aǵymdaǵy jumysymyzdyń jalǵasy dep sanaýǵa bolady», dedi depýtat.
Kezdesý barysynda Zakırjan Kýzıev Senatqa Qazaqstan halqy Assambleıasynan saılanǵan bes depýtattyń atqarǵan jumysy týraly aıtyp berdi. Ol senatorlar halyqpen 150-den astam kóshpeli kezdesý ótkizip, 5 zańǵa bastamashy bolǵanyn, onyń bireýine Prezıdent 2023 jyldyń sońynda qol qoıǵanyn habarlady.
«QHA-dan saılanǵan senatorlar halyqtan 130-dan astam ótinish qabyldady, máselelerdiń basym bóligi sheshildi, qalǵan ótinishter baqylaýymyzda tur. 130-dan astam depýtattyq saýaldar jarııa etildi, olardyń basym bóligi QHA-nyń 32-shi sessııasynda Prezıdent aıtqan tapsyrmalardy oryndaýǵa qatysty boldy. Bizdiń «bestiktiń» barlyq jumysy belsendi túrde jarııa etildi. Áleýmettik jelilerde 300-den astam maqala jarııalandy jáne telearnalarda sóz sóılendi, munyń ózi barsha azamattarǵa bizdiń jumysymyzdy kórýge jáne baǵalaýǵa múmkindik beredi», dedi senator Z.Kýzıev.
Is-sharaǵa Qazaqstan halqy Assambleıasy tóraǵasynyń orynbasary Marat Ázilhanov, Májilis depýtattary, Prezıdent Ákimshiliginiń, Mádenıet jáne aqparat mınıstrliginiń ókilderi, sondaı-aq Qazaqstan halqy Assambleıasy keńesiniń músheleri qatysty.