Sý tasqyny aımaqtarynda Sý resýrstary jáne ırrıgasııa mınıstrliginiń 1000-nan astam mamany men 280 birlik tehnıka jumyldyryldy, dep habarlaıdy Egemen.kz mınıstrliktiń baspasóz qyzmetine silteme jasap.
Sý sharýashylyǵy nysandarynda jedel is-sharalar qabyldaý úshin táýlik boıy kezekshilik uıymdastyrylyp, sý kólemine táýlik boıy monıtorıng júrgiziledi.
Sý tasqynyna qarsy is-sharalarǵa arnalǵan qor, sonyń ishinde tas, qum, qıyrshyq tas, qapshyqtar jáne basqa da qajetti ınertti materıaldar daıyndaldy.
«Mınıstrlik janynan qurylǵan jedel shtab jergilikti ákimdiktermen ózara tyǵyz is-qımyl jasap jatyr. Respýblıkalyq menshiktegi barlyq gıdrotehnıkalyq qurylystarda tasqyn sýyn apatsyz ótkizý jóninde is-sharalar jospary men sý qoımalarynyń jumys kestesi bekitildi. Jaýapty mekeme qyzmetkerleri sý sharýashylyǵy ahýalyna táýlik boıy baqylaý júrgizedi», dedi Sý resýrstary jáne ırrıgasııa mınıstri Nurjan Nurjigitov.