Elimiz halyqaralyq qaýymdastyqtyń tolyqqandy múshesi bolǵandyqtan, basyna qıyn is túsken memleketterge qoldan kelgen kómegin aıap kórgen emes. Oǵan keıingi jyldyń ishinde ǵana jan-jaqqa jóneltilgen gýmanıtarlyq júkter dálel. Gýmanıtarlyq kómektiń basym bóligi Ortalyq Azııadaǵy irgeles elderge kórsetilip otyr.
Syrtqy ister mınıstrligi janyndaǵy «Qazaqstan halyqaralyq damý agenttigi» (KazAID) kommersııalyq emes aksıonerlik qoǵamy usynǵan derek boıynsha, 2021 jyly Qazaqstan 13,9 mln dollardyń gýmanıtarlyq kómegin kórsetken. Kómekti qabyldaýshy elder – Qyrǵyzstan, Tájikstan jáne Aýǵanstan. Al 2022 jyly 23,4 mln dollardyń gýmanıtarlyq kómegin Pákistan, Ýkraına, Qyrǵyzstan, Tájikstan jáne Aýǵanstan elderine joldaǵan. 2023 jyldyń qańtarynan qyrkúıek aıyna deıin 62,7 mln dollardyń gýmanıtarlyq kómegi Pákistan, Túrkııa, Sırııa, Tájikstan jáne Aýǵanstan elderine jóneltilgen.
2023 jylǵy 6 aqpan kúni Túrkııada epısentri Kahramanmarash provınsııasynyń Pazardjık aýdanynda 7 baldan asatyn eki ret jer silkindi. Odan keıingi júzdegen dúmpýler eldiń 11 provınsııasynda jáne Sırııa sekildi kórshi memleketterde de sezildi. Memleket basshysy Qasym-Jomart Toqaevtyń tapsyrmasy boıynsha elimiz Úkimeti joıqyn jer silkinisinen zardap shekken Sırııa halqyna gýmanıtarlyq kómek jasady, Túrkııa Respýblıkasyna kómek retinde 1 mln dollar bóldi. El turǵyndary Túrkııadaǵy joıqyn zilzaladan zardap shekkenderge 3,6 mln dollardan astam qarajat jınap berdi. Munymen qosa, elimiz apat aımaǵyndaǵy turǵyndardy izdestirý jáne jedel-qutqarý jumystary úshin elimizdiń Tótenshe jaǵdaılar mınıstrliginiń jedel toby Túrkııaǵa attandy.
Syrtqy ister mınıstrliginiń resmı ókili Aıbek Smadııarovtyń aıtýynsha, ótken jyly elimiz aýǵan halqyna gýmanıtarlyq kómek kórsetý boıynsha alǵan ulttyq mindettemelerin tolyq júzege asyrdy. 2023 jyly sáýirde Qazaqstan Aýǵanstanǵa dári-dármek pen azyq-túlikten quralǵan gýmanıtarlyq júk jetkizdi. Sonymen qatar qazan aıynda Aýǵanstannyń batysyndaǵy zilzaladan zardap shekken halyqqa gýmanıtarlyq kómektiń alǵashqy legin jetkizgen arnaıy ushaq Gerat áýejaıyna qondy. Sol kezde Qazaqstannan Aýǵanstanǵa taǵy 27 vagon gýmanıtarlyq júk jóneltildi.
Al 2023 jyldyń qarasha aıynda Memleket basshysynyń tapsyrmasy boıynsha elimiz Palestına halqyna gýmanıtarlyq kómek jiberdi. Jeltoqsan aıynda Qazaqstan Palestınaǵa bólgen gýmanıtarlyq kómek – memlekettiń materıaldyq qorynan azyq-túlik, kórpe-jastyq, sondaı-aq «SK-Farmasııa» JShS-dan dári-dármek pen medısınalyq buıymdar tıelgen ushaq Mysyrǵa baryp qondy.
Budan bólek, byltyr Qazaqstan Tájikstanǵa 5 myń tonna mazýtty gýmanıtarlyq kómek retinde berdi. Al bıyl naýryz aıynda Qazaqstannyń Tájikstan Respýblıkasyndaǵy Tótenshe jáne ókiletti elshisi Ýálıhan Tórehanov Tájikstan Respýblıkasynyń Úkimeti janyndaǵy Memlekettik materıaldyq rezervter agenttigi dırektorynyń orynbasary Sohıbjon Zııodýlloevke 15 myń tonna mazýt sertıfıkatyn saltanatty túrde tabys etti.
Jaqynda Qyrǵyz Respýblıkasyna Qazaqstannyń gýmanıtarlyq júgi tapsyryldy. Gýmanıtarlyq kómek Prezıdent Qasym-Jomart Toqaevtyń tapsyrmasyna sáıkes, sondaı-aq KazAID Qazaqstandyq halyqaralyq damý agenttiginiń qoldaýymen kórsetildi.