Astana qalasynda áıelin asa qatigezdikpen qınap óltirdi dep aıyp taǵylǵan Qýandyq Bıshimbaevqa qatysty sot otyrysy júrip jatyr. Sot otyrysy aıyptalýshynyń suraýymen alqabıler alqasy jáne BAQ qatysýymen ótip jatyr. Sondaı-aq qoǵamdyq rezonans týdyrǵan qaıǵyly jaǵdaıǵa qatysty sot otyrysy Joǵarǵy sottyń resmı áleýmettik jelilerinde tikeleı efırde kórsetilip jatyr, dep habarlaıdy Egemen.kz.
«Men ony jamandaǵym kelmeıdi. Biraq Saltanat paradoksqa toly adam boldy. Ony túsine almaısyń. Turaqsyz edi, keıde bylaı, keıde basqasha aıtady. Tańerteń «aralaspaı-aq qoıaıyq», dep ketip qaldy. Keshkisin qaıtadan bir jerge aparyp tastaýymdy surady», dep kúldi Bıshimbaev sot zalynda.
Aıta keteıik, Bıshimbaevtyń bul áreketin memlekettik aıyptaýshy synǵa aldy. Prokýrordyń aıtýynsha, osy áreketimen Bıshimbaev jábirlenýshi tarap pen marqumnyń atyna qurmetsizdik kórsetip otyr.
Al Bıshimbaev júzine úıirilgen kúlkini áıeli týraly jaqsy esteliktermen baılanystyryp, keshirim surady.