Kúres túrlerinen Qyrǵyzstannyń astanasy Bishkekte ótetin Olımpııa oıyndarynyń lısenzııalyq týrnıri qarsańynda, ıaǵnı 11-16 sáýir aralyǵynda Azııa chempıonatynyń jalaýy jelbireıdi. Atalǵan jarysqa elimiz komandasy tolyq quramda qatysady. Olardyń deni – ekinshi jáne úshinshi nómirli balýandar.
Grek-rım kúresi el quramasynyń qorjynynda ázirge jalǵyz joldama bar. Onyń ıegeri – Nursultan Tursynov. 87 kg salmaqta kúresetin 33 jastaǵy Semeı óńiriniń týmasy Parıj Olımpıadasy qarsańynda osy jarysta kúsh synasýdy qup kórgen eken. Negizi Nursultan buǵan deıin Azııa chempıonattarynda tórt ret jeńis tuǵyryna kóterildi. 2014 jyly ol bas júldeni oljalasa, 2015 pen 2023 jyldary kúmisti ıelendi. Al 2022 jyly qolaǵa qol sozdy. Bishkektegi básekeni Tursynov pen onyń bapkerleri ǵalamdyq dodaǵa daıyndyq retinde qarastyryp otyr.
Byltyr Astanada uıymdastyrylǵan Azııa chempıonatynda elimizdiń «klassıkteri» arasynan jalǵyz Ibragım Magomadov (77 kg) qana altyn tuǵyrǵa kóterilgen edi. Ol kezde otandasymyz 72 kg salmaqta óner kórsetti. Bıyl 33 jastaǵy Qaraǵandy oblysynyń ókili olımpıadalyq salmaqqa aýysty. Biraq Astanadaǵy el birinshiliginde Magomadov úshinshi orynnan asa almady. Sonyń saldarynan ol lısenzııalyq týrnırge qatysý múmkindiginen aıyryldy. Desek te byltyrǵy nátıjeni qaıtalap, qatarynan ekinshi jyl Azııa chempıony atansa, taǵy bir altyn Ibragımniń taqııasyna tar kelmeıtin anyq.
Jastar arasyndaǵy álem birinshiliginiń kúmis jáne qola júldegeri Iýsýp Masıev (97 kg), Evgenıı Polıvadov (82 kg) pen Azııa chempıonatynyń qola júldegeri Mansur Shadýkaevqa (130 kg) da zor senim artylyp otyr. Osy sańlaqtarmen qatar Bishkektiń bozkileminde Nurzat Qabdyraqymov (55 kg), Ǵalym Qabdýnasarov (60 kg), Erjet Jarylqasov (63 kg), Almatbek Amanbek (67 kg), Nıkolaı Hapko (72 kg) óner kórsetedi.
Erkin kúresten de ázirge Olımpıadanyń jalǵyz joldamasyn qanaǵat tutyp otyrmyz. Sol joldamanyń ıegeri Azamat Dáýletbekov te Alataýdyń arǵy betinde aıqasýǵa táýekel etti. 86 kg salmaqta kúsh synasyp júrgen 30 jastaǵy ataqty balýan keıingi eki álem chempıonatynda qola medaldy qanjyǵasyna baılady. Sary qurlyqtyń basty dodasynda eki márte teńdessiz dep tanyldy. Bul joly Azamattyń úshinshi márte altyn tuǵyrǵa kóterilýine tamasha múmkindik bar.
Elimizdiń erkin kúres tarıhyndaǵy tuńǵysh álem chempıony Rızabek Aıtmuhanǵa bul joly Olımpııa oıyndarynyń lısenzııalyq týrnırinde baq synaý baqyty buıyrmady. О́ıtkeni 97 kg salmaqqa aýysqannan keıin ol el birinshiliginiń aqtyq saıysynda Álisher Erǵalıge ese jiberdi. Alaıda Rızabek áli de joldamadan kúderin úzgen joq. Sý jańa álem chempıony da Fransııanyń astanasynda atoı salýdy armandaıdy. Bul rette bári de Álisherge baılanysty. Bishkekte Erǵalıdyń joly bolsa, onda joǵarydaǵy áńgime sap tıylady. Al saqa sportshy sátsiz óner kórsetse, 9-12 mamyr aralyǵynda Túrkııanyń Ystanbul qalasynda ótetin sońǵy lısenzııalyq týrnırge Aıtmuhannyń qatysýy ábden múmkin.
36 jastaǵy Ádilet Daýlymbaevqa bul – sońǵy olımpıadalyq sıkl. Kezinde ol táýir kúresti. Azııa oıyndary men qurlyq chempıonaty, basqa da halyqaralyq týrnırlerde san márte júldegerler qatarynan kórindi. Biraq eńbekqor jigittiń Olımpıadaǵa joly túspedi. Bıyl da Parıjdegi dodadan shet qaldy. Sondaı-aq Ádilet Azııa chempıonatynda altyn alǵan emes. Sol olqylyqtyń ornyn toltyrý úshin saqa sportshy Bishkekke attanyp barady. Qyrǵyzstanda Daýlymbaev 92 kg salmaqta beldesedi. Al ózge salmaq dárejelerinde Meırambek Qartbaı (57 kg), Asyl Aıtaqyn (61 kg), Muhtar Sanjar (65 kg), Meıirjan Áshirov (65 kg), Syrbaz Talǵat (74 kg), Azamat О́mirjanov (79 kg), Abylaı Sovet (125 kg) baq synaıdy.
Áıelder kúresinen ótetin jarysta Irına Jánibekova (50 kg), Aıajan Marqasheva (53 kg), Zúlfııa Iаhıarova (55 kg), Laýra Almaǵambetova (57 kg), Dına Kaıýmova (59 kg), Tynys Dýbek (62 kg), Irına Kazıýlına (65 kg), Mádına Baqbergenova (68 kg), Anastasııa Panasovıch (72 kg), Elmıra Syzdyqova (76 kg) saıysqa túsedi.