BQO-da Jaıyq ózenindegi sý deńgeıiniń kóterilýine baılanysty adamdardy aldyn ala evakýasııalaýdyń ekinshi kezeńi bastaldy, dep habarlaıdy Egemen.kz Úkimettiń baspasóz qyzmetine silteme jasap.
Jaıyq boıyndaǵy úıler men saıajaılarda turatyn halyq ózenniń arnasynan shyǵýyna baılanysty evakýasııalanady.
Bul týraly kezekti áýeden barlaýdan keıin oblysta júrgen Premer-mınıstrdiń orynbasary Nurlan Baıbazarov málimdedi.
«2024 jylǵy 8 sáýirdegi jaǵdaı boıynsha ózendegi sý deńgeıi 703 sm-ge jetti jáne áli de kóterilip jatyr. Byltyr maksımým 557 sm bolǵan. Sý Reseı Federasııasy tarapynan tasqynǵa baılanysty Irıkla men Prıýzen sý qoımalarynan qarqynmen jiberilip jatyr. Evakýasııalyq pýnktter azamattardy qabyldaýǵa daıyn», dedi Nurlan Baıbazarov.
Jaıyq ózeniniń jaǵalaýyn nyǵaıtý jáne Oral qalasy men oblystyń tórt aýdanynda dambalar salý jumystary jalǵasyp jatyr. Atap aıtqanda, Darınsk, Baıqońys, Ozernyı, Volodar, Iаnvarsevo, Aqsý, Rýbejınskoe jáne t. b. aýyldardyń mańynda ýaqytsha dambalar salynady.
Qala basshylyǵy turǵyndardan ákimdik ókilderi men eriktilerdiń nusqaýlaryn oryndaýdy suraıdy. Tolyq evakýasııadan keıin qajet bolǵan jaǵdaıda gaz, sý jáne elektr qýaty óshiriledi. Evakýasııalanǵan aýdandardaǵy quqyqtyq tártipti jergilikti polısııa qyzmeti men TJD qamtamasyz etedi.