Keńes Odaǵynyń Batyry, armııa generaly Saǵadat Nurmaǵambetovtiń týǵanyna – 100 jyl. Osyǵan oraı elordanyń 12 ýnıversıtetinde bir saǵatta ult batyrynyń ómir joly týraly dáris uıymdastyryldy. Aýqymdy is-sharaǵa 2,5 myńnan astam stýdent qatysty.
El Prezıdenti Qasym-Jomart Toqaev «Egemen Qazaqstan» gazetine bergen suhbatynda jáne Atyraý qalasynda ótken Ulttyq quryltaıdyń «Adal adam – Adal eńbek – Adal tabys» atty úshinshi otyrysynda halqymyzdyń kórnekti tulǵalarynyń tynys-tirshiligin zerdeleý jáne este saqtaý jalpyulttyq biregeılikti nyǵaıtýǵa yqpal etetinin atap ótti. Osy maqsatta uıymdastyrylǵan is-shara «Saǵadat» ánimen bastaldy. Sodan soń Ulttyq qorǵanys ýnıversıtetiniń oqytýshylary, Tótenshe jaǵdaılar mınıstrligi, Ulttyq ulannyń joǵary oqý ornynda bilim alýshy áskerı qyzmetshileri dáris oqydy.
– Soǵys batyrlarynyń mereıtoılaryna baılanysty Memleket basshysynyń aıtqan is-sharalaryn júzege asyrý úshin ýnıversıtettiń professorlyq-oqytýshylar quramy men magıstranttary «S.Q.Nurmaǵambetovtiń ómir joly – jaýyngerlik dástúr sabaqtastyǵynyń tarıhy» degen taqyrypta dáris daıyndady. Osyndaı dáristi bıyl qazan aıynda Halyq qaharmany Rahymjan Qoshqarbaevtyń júz jyldyǵyna oraı ótkizýdi de josparlap otyrmyz, – dedi Ulttyq qorǵanys ýnıversıtetiniń basshysy, general-maıor Asqar Mustabekov.
Uıymdastyrýshylardyń sózinshe, bul is-shara jastardyń boıyndaǵy patrıottyq rýhty oıatyp, ómirlik baǵdaryn aıqyndaýǵa sep bolady. Sondyqtan dáris bir ýaqytta L.N.Gýmılev atyndaǵy Eýrazııa ulttyq ýnıversıteti, Qazaq ulttyq óner ýnıversıteti, Qazaq ulttyq horeografııa akademııasy, S.Seıfýllın atyndaǵy Qazaq agrotehnıkalyq zertteý ýnıversıteti, «Astana» medısına ýnıversıteti, Esil University, «Turan-Astana» ýnıversıteti, Eýrazııa gýmanıtarlyq ınstıtýty, Astana IT University, «Astana» halyqaralyq ýnıversıteti, Qazaq tehnologııa jáne bıznes ýnıversıteti, Dene shynyqtyrý jáne buqaralyq sport akademııasy jáne S.Nurmaǵambetov atyndaǵy áskerı kolledjinde ótti.
– Saǵadat Nurmaǵambetovtiń taǵdyry jarqyn estelikterge toly. Onyń ómir jolynda búkil álemdi dúr silkindirgen, mıllıondaǵan adamnyń ómirin jalmaǵan, talaı taǵdyrdy ózgertken surapyl kezeń beınelengen. Meni batyrdyń úshjyldyq áskerı bilimdi 3 aıda alyp shyqqany qatty tańǵaldyrdy. Jastardyń azamattyq ustanymynyń qalyptasýyna úles qosatyn osyndaı dáristerdiń kóbirek ótkizilgeni ıgi, – deıdi stýdent Qaınar Nurıllauly.