Elimizdiń Qarýly kúshterinde «Altyn Jebe-2024» bólimsheleri keshendi tekserýden ótti. Basty maqsat – jaýyngerlerdiń ázirligin, kez kelgen tapsyrmany belgilengen merzimde oryndaýyn, qarym-qabiletin tekserý. Sondaı-aq barlyq sanattaǵy áskerıdiń dalalyq bilimi men kásiptik daıarlyq deńgeıin jetildirý.
Dástúrli tekserý aıasynda 41433 áskerı bólimshesiniń sarbazdary normatıvter keshenin tapsyrdy. Aldymen áskerı bólimder jaýyngerlik ázirlikke keltirilip, mindetterdi oryndaý aýdanynda marsh jasady. Minez ben kúsh-jigeri shyńdalǵan alańda jasaq qazirgi zamanǵy urystyń talaptary men sharttaryna saı kúndiz jáne túnde armııalyq taktıkalyq oq atý jattyǵýlaryn oryndady.
– «Altyn Jebe-2024» keshendi tekserý kezinde «Qaraban» polıgonyndaǵy 41433 áskerı bólimshesi kórsetilgen merzimge 15 shaqyrym tolyq eseppen sherý ótkizdi. Bul tekserýlerde toptardyń quramy olarǵa júktelgen mindetterge baılanysty qalyptasady. Osyǵan baılanysty olar birlesip sherý ótkizip, qorǵanys ádisterin pysyqtap, basqa da is-áreketterdi shyńdady. Mundaı jattyǵýlar dalalyq daǵdylardy jetildirýge, jaýyngerlik jaǵdaıǵa jaqyn jaǵdaıda jumys isteıtin bólimshelerdiń úılesimdiligine yqpal etedi. Dál osyndaı jaǵdaılarda taktıkalyq bir-biriniń áreketterin sezip jáne óz qabiletterine degen senimdilik paıda bolady. Barlyq qoıylǵan mindet pen normatıvti áskerı qyzmetshiler «óte jaqsy» pysyqtady, – dedi 41433 áskerı bólimshesiniń komandıri podpolkovnık Jalǵas Rahymǵalıev.
Bólimshelerdi tekserý baǵdarlamasy jyl saıyn tolyqtyrylyp, kúrdelenip otyrady. Jalpy is-qımyldar dala aımaǵynda josparlanady. Bul maskırovka jasaýda jáne shartty jaýmen kúresýde urysty qıyndatýǵa sep bolady. Tekserý kezinde sarbazdardyń barlaý-izdeý áreketteri de synaldy. Sondaı-aq olar áskerı topografııa, dıversııalyq is, radıasııalyq, hımııalyq jáne bıologııalyq qorǵaý, medısınalyq daıyndyq boıynsha arnaıy normatıvterdi tapsyrdy.