Qazaqstannyń 30 jastaǵy tanymal tennısshisi Zarına Dıas eki jylǵa sozylǵan úzilisten keıin úlken sportqa qaıta oraldy. Ol 12-13 sáýir aralyǵynda Tokıoda ótetin Devıs kýboginiń irikteý saıysynda Japonııa quramasyna qarsy oınaıdy.
Joǵarydaǵy jańalyqty estigen jankúıerler kádimgideı qýanyp qaldy. Onyń ózindik sebebi de bar. Bul kúnderi túrli halyqaralyq týrnırde tabysty óner kórsetip júrgen tennısshilerimizdiń deni legıonerler ekeni belgili. Al Zarına – ózimizdiń tól túlegimiz. Onyń ata-anasy 1999 jyly jumys babymen Chehııaǵa qonys aýdardy. Sporttyq karerasyn sol jaqta bastaǵan Dıas birte-birte óz qatarlastary arasynda daralana bastady. Otandasymyz áýeli Pragadaǵy, odan keıin Gýanchjoýdaǵy tennıs akademııalarynda sheberligin shyńdady.
Jasóspirimder men jastar býyny arasyndaǵy jarystarda eleýli tabystarǵa qol jetkizgennen keıin Dıas áıelderdiń básekesinde baq synaı bastady. Bul rette ol ózin jaqsy qyrynan kórsetti. «Úlken dýlyǵa» sanatyndaǵy týrnırdegi jerlesimizdiń eń zor tabysy – 2014 jáne 2015 jyldary Ýımbldonnyń tórtinshi kezeńine deıin jetýi. Aýstralııa (2014, 2015, 2020, 2021) men AQSh-tyń (2014) ashyq birinshilikteriniń úshinshi aınalymynda óner kórsetti. WTA dodasynda bir ret dara shyǵyp, ITF týrnırlerinde toǵyz ret top jardy. 2015 jyldyń basynda Zarına álemdik reıtıngte 31-orynǵa kóterildi.
2021 jyldan beri jerlesimizdiń sporttyq karerasynda quldyraý kezeńi bastaldy. Ol dúbirli dodalarda jıi jeńildi. Sonyń saldarynan WTA reıtıngindegi jaǵdaıyn nasharlatyp aldy. Keıinnen Zarınanyń jaraqaty bolǵanyn bildik. Eger emdelmese, oıyny júrmeıtinine anyq kóz jetkizgennen keıin oıynshy densaýlyǵyn durystaýǵa kiristi. Mine, endi, jaraqatynan tolyqtaı aıyqqannan soń qaıta kortqa shyqpaq. Jýyrda Qazaqstan komandasynyń kapıtany Iýrıı Shýkın Zarına Dıasty Devıs kýboginiń irikteý saıysynda kúsh synasatyndardyń tizimine qosty.