Úkimet qaýlysymen tasqyn saldarynan zardap shekken Qostanaı oblysyna qarasty Arqalyq qalasy turǵyndaryn baspanamen qamtamasyz etý úshin 2024 jylǵa arnalǵan respýblıkalyq bıýdjette kózdelgen Úkimettiń tótenshe rezervinen 405 mln teńge bólindi. Qarjylandyrý О́nerkásip jáne qurylys mınıstrligi arqyly komıssııanyń baǵalaýyna sáıkes Arqalyq qalasynda úıleri qalpyna keltirýge kelmeıtin otbasylarǵa turǵyn úı satyp alý úshin nysanaly transfertter túrinde Qostanaı oblysynyń ákimdigine jiberildi, dep habarlaıdy Egemen.kz Úkimettiń baspasóz qyzmetine silteme jasap.
Atalǵan oblystaǵy sý tasqyny jaǵdaıy respýblıkalyq shtabtyń baqylaýynda tur. Búginde úlken sýdyń qarqyny báseńdep, qaýiptiń beti qaıta bastady. Qalalyq jáne aýdandyq ákimdikter tabıǵı sıpattaǵy TJ saldarynan múlki búlingen azamattardan materıaldyq shyǵyndy óteý týraly ótinishterdi tirkedi. Baǵalaý komıssııasy jumysynyń qorytyndysy boıynsha sheshim qabyldandy. Sonymen birge Arqalyq qalasynda jáne basqa da eldi mekenderde úılerdi tekserý jumystary jalǵastyrylyp jatyr.
TJ rejımi jarııalanǵan basqa oblystarda da zardap shekken nysandardy tehnıkalyq tekserý, baǵalaý, tizbesin jasaý boıynsha jumystar júrgizilip jatyr. Qaýiptiń azaıýyna qaraı zardap shekken azamattardyń turǵyn úı máseleleri sheshiletin bolady.