Memleket basshysy tabıǵı apattan zardap shekken aımaqtardaǵy azyq-túlik qaýipsizdigi máselesin aıryqsha baqylaýda ustaý jáne baǵanyń ósýine jol bermeý qajet ekenine taǵy da nazar aýdardy, dep habarlaıdy Egemen.kz Aqordanyń baspasóz qyzmetine silteme jasap.
Sondaı-aq azamattar úshin áýe jáne temir jol kólikterine bılettiń qymbattaýyna jol berýge bolmaıtynyn eskertti.
«Úkimet pen ákimdikter zardap shekken adamdardy ornalastyrý, olarǵa qajetti kómek berý máselelerin tez arada sheshýge tıis. Qazir bul jumystar atqarylyp jatyr. Evakýasııalyq pýnktterdegi jaǵdaıdy turaqty baqylaýda ustaý kerek. Joǵalǵan qujattardy qalpyna keltirý, quqyqtyq jáne psıhologııalyq kómek kórsetý pýnktterin jedel uıymdastyrý qajet. Aıtpaqshy, joǵalǵan qujattar da problema bolady. Adamdar úılerin asyǵys tastap ketti. Qujattaryn qalpyna keltirýge kómektesý kerek. Jaǵdaı óte kúrdeli aýdandarda qoǵamdyq shtabtar ornalastyrylyp, túsindirý jumystary júrgizilsin», dedi Prezıdent.
Jıyn barysynda Densaýlyq saqtaý mınıstrligine Aýyl sharýashylyǵy mınıstrligimen birge elimizdegi sanıtarııalyq-epıdemıologııalyq jáne epızootııalyq jaǵdaıǵa baqylaýdy kúsheıtip, táýlik boıy monıtorıng júrgizý, sondaı-aq kóppáterli úılerge, áleýmettik jáne basqa da nysandarǵa dezınfeksııa jasaý jóninde tapsyrma berildi.
Sý tasqynyna baılanysty juqpaly aýrýlardyń taralyp jatqany jáne epıdemıologııalyq jaǵdaıdyń nasharlaǵany týraly áleýmettik jelilerde jarııalanǵan aqparat rastalmady.