Qazaqstan Prezıdenti Qasym-Jomart Toqaevtan suhbat alǵan «Armenpress» aqparat agenttigi elimizdiń halyqaralyq arenada talaı ret bitimgerlik bastamalar jaqtaýshysy bolǵanyn aıta kele, Astananyń bul baǵyttaǵy jańa bastamalary qandaı ekenin surady, dep habarlaıdy Egemen.kz.
Prezıdenttiń aıtýynsha Álemdik qoǵamdastyqtyń belsendi jáne jaýapty qatysýshysy retinde Qazaqstan turaqty negizde bitimgershilik bastamalardy ilgeriletý jolymen halyqaralyq jáne óńirlik qaýipsizdikti qamtamasyz etýge barynsha úles qosady. Bizdiń elimiz jappaı qyryp-joıý qarýyn qarýsyzdandyrý jáne taratpaý, ıadrolyq qarýdan azat aımaqtar qurý isinde jalpyǵa tanylǵan kóshbasshy ekeni belgili.
«Jahandyq antııadrolyq qozǵalystaǵy óz tájirıbesin paıdalana otyryp, Qazaqstan Iran ıadrolyq baǵdarlamasy boıynsha kópjaqty kelissózderdi uıymdastyrýǵa eleýli úles qosty. 2013 jyly Astanada kelissózderdiń eki raýndy uıymdastyryldy, olar «altylyq toby» men Irannyń formatyn jańǵyrtýǵa yntalandyrdy. Osy kúsh-jigerdiń nátıjesi retinde 2015 jyly Iran boıynsha birlesken jan-jaqty is-qımyl josparyna qol qoıylǵany belgili. Qazaqstannyń halyqaralyq turaqtylyq pen qaýipsizdikti qamtamasyz etýge qosqan taǵy bir mańyzdy úlesi kópjyldyq sırııalyq qaqtyǵysty retteý úshin óz alańyn usyný bolyp tabylady. 2017 jyldan bastap qazirgi ýaqytqa deıin Astana prosesi aıasynda kelissózderdiń 21 raýndy ótkizildi. Osy halyqaralyq tuǵyrnamanyń Sırııadaǵy qaqtyǵysty retteýge qosqan úlesin BUU jáne kóptegen álemdik kóshbasshylar moıyndady», dedi Memleket basshysy.
Prezıdent sonymen qatar, Qazaqstannyń syrtqy saıasatynyń mańyzdy baǵyty BUU sheńberindegi bitimgershilik qyzmeti ekenin, 2014 jyldan bastap 600-den astam Qazaqstannyń áskerı qyzmetshi BUU bitimgershilik mıssııalaryna qatysqanyn, qazirgi ýaqytta bizdiń bitimgershilerimiz Lıvandaǵy, Batys Saharadaǵy, Ortalyq Afrıka Respýblıkasyndaǵy, Kongo Demokratııalyq Respýblıkasyndaǵy BUU mıssııalaryna qatysyp jatqanyn, 2022 jyldan bastap BUU-nyń Malıdegi mıssııasyna da qatysqanyn atap ótti.
«Bıyl 15 naýryzdan bastap bizdiń memleketimizdiń tarıhynda tuńǵysh ret otandyq bitimgershilik kontıngent Golan jotasynda BUU Mıssııasynda 7 áıeldi qosa alǵanda, 139 adamnan turatyn derbes bólimshe retinde ornalastyryldy. Sizdi qyzyqtyratyn jańa bastamalarǵa keletin bolsaq, munda armıan-ázirbaıjan qatynastaryn retteý tóńiregindegi ahýal týraly másele týyndaıdy. Sózsiz, Qazaqstan bul taqyrypqa nemquraıly qaramaıdy. Biz dostas eki memleket arasynda tez arada beıbit shart jasalýyna múddelimiz. Erevan men Baký arasynda berik jáne uzaq merzimdi beıbitshilik ornatý bizdiń elimizdiń múddesine saı keledi. Bitimgershilik bastamalardyń bastamashysy jáne jaqtaýshysy retinde Qazaqstan beıbit jáne turaqty damýǵa baǵyttalǵan kez kelgen kúsh-jigerdi qoldaýǵa daıyn», dedi Prezıdent.